Malalamiko makali ya Oxfam kwa kundi la G7

Kikao cha kundi la G7 kinafanyika leo Jumapili katika mji wa Elmau nchini Ujerumani katika hali ambayo, shirika lisilo la kiserikali la Oxfam limeonya kuwa, hatua ya nchi zinazounda kundi hilo ya kuendelea kutumia makaa ya mawe, inashadidisha njaa duniani kiasi kwamba ifikapo mwaka 2100, jamii ya mwanadamu itakuwa inapata hasara ya karibu dola bilioni 450 kila mwaka na hasara kubwa itaikumba sekta ya kilimo. Shirika la habari la Ufaransa limelinukuu shirika hilo likisema jana Jumamosi kwamba, matumizi ya makaa ya mawe yataongeza umaskini duniani kwani kinu chochote kile kinachotumia makaa hayo ni sawa na silaha hatari ya kuangamiza mazingira. Shirika hilo limesema kuwa, matokeo ya kutumiwa makaa ya mawe ni kuharibu ardhi za kilimo na kupanda bei za vyakula na hivyo kuongeza idadi ya watu wanaoteseka kwa njaa ulimwenguni. Shirika hilo limezitaka nchi zote zilizoendelea ziache kutumia makaa ya mawe na badala yake zitumie nishati jadidika na kwamba zinapaswa kubadilisha siasa zao haraka kwani tayari madhara ya kutumia nishati ya makaa ya mawe ni makubwa. Kwa kweli kundi la G7 ambalo linaundwa na nchi za Canada, Ufaransa, Ujerumani, Uingereza, Italia, Japan na Marekani ndizo zinazohusika kwa kiwango kikubwa katika uchafuzi wa mazingira na hali ya hewa. Ni jambo lililo wazi kwamba kuendelea kupanda kiwango cha joto ardhini kuna athari mbaya zisizofidika kwa mazingira na pia kwa sekta ya kilimo hasa katika nchi zinazoendelea na matokeo yake ni kupungua mazao ya kilimo na hivyo kuongezeka idadi ya watu wanaoteseka kwa njaa. Hali ni mbaya kiasi kwamba Umoja wa Mataifa umelazimika kuwekeza kwa ajili ya watu maskini katika nchi zinazoendelea ili kuona watu hao watasaidiwa vipi iwapo mazingira ya nchi zao yatazidi kuharibiwa. Jambo la kusikitisha ni kuona kuwa, licha ya dunia nzima kujua hatari kubwa ya kuharibiwa mazingira na hali ya hewa, lakini nchi zilizoendelea kiviwanda kama vile Marekani hadi leo hii zinaendelea kukaidi kushirikiana na nchi nyingine duniani katika jitihada za kuiokoa dunia na janga hilo. Wakati ambapo nchi hizo zilizoendelea kiviwanda ndizo wachafuaji wakubwa wa mazingira, madhara ya uchafuzi huo yanazikumba nchi za Asia na Afrika ambazo hazifaidiki na maendeleo ya viwanda ya madola makubwa bali zinazidi kukandamizwa. Watetezi wa hali ya hewa duniani wanasisitizia mno suala la kulipwa fidia nchi zinazoendelea hususan za Afrika kutokana na uchafuzi wa mazingira unaofanywa na madola yaliyoendelea kiviwanda. Hata hivyo madola hayo si tu yanadharau miito hiyo, bali hata yanazidisha matumizi ya mada zinazohatarisha usalama wa dunia nzima kama makaa ya mawe, bila ya kujali hasara zinazopata nchi zinazoendelea.