Balozi Karume kutangaza nia leo

JOTO la urais wa awamu ya tano linazidi kupanda miongoni mwa makada wa CCM, baada ya baadhi yao kuanza kutangaza nia, na leo Balozi mstaafu Ali Karume anatarajiwa kufanya hivyo, akilenga kutaka kumrithi Rais Jakaya Kikwete anayemaliza muda wake Oktoba mwaka huu.
Balozi Karume ambaye ni mjumbe wa Halmashauri Kuu ya Taifa (NEC) ya CCM, alisema anakusudia kutangaza nia katika ofisi ya Halmashauri ya Wilaya ya Kati, Dunga.
Akizungumza na gazeti hili, Karume alisema atajitosa katika kinyang'anyiro hicho ikiwa ni mara ya pili kufanya hivyo kwa nafasi ya urais wa Jamhuri ya Muungano wa Tanzania, mara ya kwanza ikiwa mwaka 2010.
“Nakusudia kutangaza nia ya kuwania urais wa Jamhuri ya Muungano kwa sababu sifa ninazo pamoja na uwezo wa kuongoza Jamhuri ya Muungano wa Tanzania,” alisema.
Balozi Karume ni mwanadiplomasia mstaafu ambaye alipata kushika nafasi za kuwa balozi wa Tanzania katika nchi mbali mbali duniani zikiwemo Marekani, Ubelgiji, Ujerumani na Italia ambako alistaafia kazi miaka minne iliyopita.
Wakati Karume akiwatarajiwa kuanika dhamira yake leo, Waziri wa zamani wa Fedha wa Serikali ya Mapinduzi ya Zanzibar, Amina Salum Ali naye anakusudia kuchukua fomu ya kuwania urais wa Jamhuri ya Muungano mjini Dodoma wiki hii.
Akizungumza na gazeti hili wiki iliyopita, alisema ameshawishika kuchukua fomu ya urais kutokana na nafasi na fursa zilizopo kwa wanawake kushika nafasi ya uongozi wa ngazi za juu.
Alisema huu sio wakati wa kuwaachia wanaume kufanya kila kitu na kujiamulia, kwa sababu wanawake wa Tanzania wamewezeshwa na kujengewa uwezo ambao sasa unatosha kuwafanya kushika nafasi za juu za uongozi.
“Msimamo wangu siku zote naamini kwamba mwanamke anao uwezo mkubwa wa kushika nafasi za juu za uongozi na ndio maana nimekuwa nikijitokeza kuwania nafasi hizo kadri inavyowezekana,” alisema.
Mwaka 2000, Amina ilikuwa mwanamke pekee aliyejitokeza kuwania katika kinyang'anyiro cha urais wa Zanzibar na kuibuka nafasi ya nne kwa kupambana na Rais mstaafu Abeid Amani Karume na Waziri kiongozi wa wakati huo Dk Mohammed Gharib Bilal ambaye sasa ni Makamu wa Rais wa Tanzania.
Mwanasiasa huyo mkongwe ambaye ni Balozi wa Umoja wa Afrika katika Umoja wa Mataifa (UN), aliwahi kuwa Waziri wa Fedha katika utawala wa Rais Dk Salmin Amour Juma 'Komandoo’, lakini, amewahi kuwa Waziri wa Mambo ya Nje, chini ya utawala wa Rais Ali Hassan Mwinyi.
Wanadiplomasia hao, Karume na Amina wanakuwa Wazanzibari pekee hadi sasa kuonesha nia ya kuingia katika kinyang’anyiro cha urais wa Tanzania.
Naibu Katibu Mkuu wa CCM (Zanzibar), Vuai Ali Vuai alisema kwa mujibu wa utaratibu uliowekwa na chama, watu wanaokusudia kuchukua fomu kuwania nafasi ya urais wa Jamhuri ya Muungano wa Tanzania watalazimika kwenda Dodoma, yaliko makao makuu ya chama hicho.