Blatter akanusha kuhusika na rushwa

                                                               Rais wa FIFA Sepp Blatter amesema shrikisho hilo la kandanda duniani linachukuwa hatua kuwaondoa hofu wafadhili, kuhusiana na kashfa za rushwa, huku akikanusha kuwa aliidhinisha malipo ya dola milioni 10 kwa mmoja wa maafisa waliokamatwa kwa tuhuma za rushwa - Jack Warner. Blatter amesema katika mkutano wake wa kwanza na wandishi wa habari baada ya kuchaguliwa tena kuiongoza FIFA hapo jana, kwamba atafanya ziara binafsi ya kukutana na wafadhili wakuu wa FIFA walioeleza wasiwasi wao. Miongoni mwa wafadhili wakuu walioleza wasiwasi kufuatia kadhia hiyo ni pamoja na kampuni za Visa, Coca Cola, na ile ya vifaa vya michezo ya Ujerumani Adidas. Blatter amesema walikuwa na mawasiliano na wafadhili hao na wanaanza kurudisha heshima ya FIFA. Blatter amesema kadhia ya Jack Warner haimhusu na kuongeza kuwa Wamarekani wana haki ya kuchunguza madai hayo, lakini yeye hana wasiwasi wowote kwamba anaweza kuhusishwa na kadhia hiyo.