PGCC ni Baraza la kuuhami utawala wa Aal Saud?

   Kikao cha 135 cha Baraza la Ushirikiano la Ghuba ya Uajemi (PGCC) kimemalizika katika mji mkuu wa Saudi Arabia, Riyadh katika hali ambayo mbali na kuunga mkono mashambulio ya Saudia nchini Yemen kimelaani pia haki ya Wayemeni ya kujihami na mashambulio hayo. Katika taarifa yao waliyotoa siku ya Alkhamisi mwishoni mwa kikao chao hicho, Mawaziri wa Mambo ya Nje wa nchi wanachama wa PGCC walilaani mashambulio ya makombora yaliyolenga baadhi ya maeneo ya mpakani ya Saudia kutokea ardhi ya Yemen na kudai kwamba ni haki ya Saudia kuchukua hatua za lazima kwa ajili ya kulinda amani na uthabiti wa ardhi yake pamoja na raia wake. Taarifa hiyo ya kikao cha Riyadh iliunga mkono pia kikao cha Geneva kitakachozikutanisha pande hasimu za Yemen ambacho kinatazamiwa kufanyika siku ya Jumapili. Uungaji mkono wa mawaziri wa nchi wanachama wa Baraza la Ushirikiano la Ghuba ya Uajemi kwa mashambulio ya Saudi Arabia dhidi ya Yemen unamfanya mtu ajiulize kama hili kweli ni Baraza la Ushirikiano la Ghuba ya Uajemi, au Baraza la kutumikia malengo na maslahi ya Saudia? Ukweli ni kwamba utendaji wa Baraza la Ushirikiano la Ghuba ya Uajemi haukidhi viwango vya jumuiya na taasisi ya kieneo, kwa sababu PGCC imeonesha kuwa ni baraza linalotumiwa kuihami na kuiunga mkono klabu ya wafalme, na liko mbali kabisa na ushughulikiaji wa matakwa na maslahi ya wananchi wa nchi wanachama. Mfano wa wazi wa suala hili unaonekana katika uingiliaji kijeshi wa baadhi ya nchi za Kiarabu huko Bahrain. Katika hali ambayo akthari ya wananchi wa Bahrain wanataka mabadiliko ya utawala, Baraza la Ushirikiano la Ghuba ya Uajemi likiongozwa na utawala wa Aal Saud limetuma vikosi vyake huko Bahrain ili kuulinda utawala wa ukoo wa Aal Khalifa na kupambana na wananchi wa nchi hiyo. Nukta nyengine ni kwamba kila mara utendaji wa PGCC umekuwa ukikidhi na kudhamini waziwazi malengo na maslahi ya Saudi Arabia. Kwa maneno mengine, wakati baraza hilo limewahi kukosoa na kulaumu utendaji na siasa za Qatar, na hata Saudia, Bahrain na Imarati zikaamua kuwaita nyumbani mabalozi wao waliokuweko Doha, msimamo wa aina hiyo haujawahi kuchukuliwa katu kuhusiana na Saudia, na sababu yake ni kwamba nchi zote wanachama wa Baraza la Ushirikiano la Ghuba ya Uajemi hazina budi kutii na kufuata matakwa ya ukoo wa Aal Saud. Na hilo linaonekana dhaahir shaahir kwenye taarifa ya kikao cha 135 za Mawaziri wa Mambo ya Nje wa nchi wanachama wa PGCC. Kwani katika hali ambayo mashambulio ya Saudia dhidi ya Yemen ni ukiukaji wa wazi wa sheria za kimataifa, utawala wa Aal Saud umefanya ukiukaji mkubwa wa haki za binadamu kwa kuwaua na kuwajeruhi maelfu ya watu nchini Yemen, hisia za chuki za fikra za waliowengi katika ulimwengu wa Kiarabu dhidi ya Aal Saud zimeshtadi, na pia imethibitika kwamba Saudia imeshindwa katika shambulio lake hilo, lakini taarifa ya mwisho ya kikao cha PGCC imeuunga mkono uovu huo uliofanywa na utawala wa Kifalme wa Riyadh. Uungaji mkono huo unaonesha kuwa badala ya PGCC kuwa chombo huru na wanachama wake kutoa mchango wa maana kwa ajili ya amani na usalama wa Ghuba ya Uajemi, baraza hilo limegeuka kuwa muhuri tu wa kuidhinisha na kuhalalisha kila hatua ya upande mmoja inayochukuiwa na utawala wa Aal Saud. Inafaa tuseme kuwa kama ambavyo zama za mifumo ya tawala za kifalme katika nchi za Kiarabu zimefikia ukingoni, utendaji wa sasa wa Baraza la Ushirikiano la Ghuba ya Uajemi nao pia hauna ufanisi tena, hivyo kuna udharura wa kuangaliwa na kutathminiwa upya utendaji wa chombo hicho.