Burundi: Uchaguzi utaendelea kama ulivyopangwa

Waziri wa Mambo ya Ndani wa Burundi, Edward Nduwimana, amesema kuwa uchaguzi wa bunge na ule wa serikali za mitaa utafanyika wiki ijayo kama ilivyopangwa. Waziri Nduwimana ameashiria hatua ya Umoja wa Ulaya ya kuwaondoa waangalizi wake na kujiondoa kanisa Katoliki kwenye mchakato wa uchaguzi na kusema matukio hayo hayawezi kuathiri uchaguzi ujao. Kiongozi huyo pia amesisitiza kuwa, licha ya maandamano madogo yanayoendelea Bujumbura, kiujumla hali ni shwari katika maeneo mengi ya nchi na hivyo kuna mazingira mazuri ya kufanyika uchaguzi juma lijalo. Edward Nduwimana, Waziri wa Mambo ya Ndani wa Burundi amesema chaguzi nyingi katika nchi mbalimbali duniani hukumbwa na matatizo ya hapa na pale na kwa mantiki hiyo, yanayojiri katika nchi yake hayafai kuonekana kama jambo la ajabu. Uchaguzi wa bunge na serikali za mitaa umepangwa kufanyika Juni 2.