G7 kuanza mkutano wa kilele

Mataifa saba yenye nguvu za kiuchumi duniani, G7, yanaanza mkutano wao wa kilele hivi leo katika kijiji cha Elmau kusini mwa Ujerumani, huku mzozo wa madeni wa Ugiriki ukizidi kuja juu. Jana Kansela Angela Merkel wa Ujerumani alizungumza kwa njia ya simu na Rais Francoise Hollande wa Ufaransa na Waziri Mkuu wa Ugiriki, Alexis Tsipras, kujadili deni la Ugiriki, wakati muda wa mwisho wa kufikia makubaliano juu ya deni hilo ukiwadia. Rais wa Kamisheni ya Umoja wa Ulaya, Jean-Claude Juncker, alikataa kuzungumza kwa simu na Tsipras hapo jana, akisema hakuna maendeleo yoyote yaliyofikiwa kwa upande wa Ugiriki. Juzi Ijumaa, Tsipras aliwataka wakopeshaji wa nchi yake kuondoa masharti aliyoyaita "ya kuudhi" ili pande hizo mbili zifikie makubaliano. Uwezekano wa Ugiriki kutangazwa muflisi unautishia mustakabal  wa sarafu ya euro.