Upinzani Burundi wataka uchaguzi wa rais kabla ya Agosti

Kiongozi mkuu wa upinzani nchini Burundi amesema kuwa lazima uchaguzi wa rais ufanyike mwezi wa nane mwaka huu, ingawa amekiri kuwa hakuna uwezekano wa uchaguzi huo kuwa huru na wa haki bila ya usalama na vyombo huru vya habari. Agathon Rwasa anayegombea urais dhidi ya rais wa sasa, Pierre Nkurunziza, ameliambia shirika la habari la Reuters kwamba kufikia Agosti mwaka huu muhula wa mwisho wa Rais Nkurunziza unamalizika na ni vyema uchaguzi ukawa umeshafanyika. Rwasa amesema hakuna uwezekano wowote wa kuwa na serikali ya mpito na kwamba lazima katiba iheshimiwe. Maandamano ya siku kadhaa yaliyofuatiwa na jaribio lililoshindwa la mapinduzi yalichochewa na uamuzi wa Rais Nkurunziza wa kuendelea kugombea muhula wa tatu, hatua ambayo wapinzani wake wanasema inakiuka katiba na makubaliano ya amani ya Arusha.