Yanga wazungumza na Platinum Fc juu ya mshambuliaji Donald Ngoma

Mshambuliaji wa Plutnum Fc Donald Ngoma

KLABU ya FC Platinum ya Zimbabwe imesema kwamba wapo kwenye mazungumzo na Yanga SC ya Tanzania juu ya biashara ya mshambuliaji Donald Ngoma.
Msemaji wa FC Platinum, Chido Chizondo alisema mazungumzo yanaendelea baina ya pande hizo mbili kwa matumaini ya kufikia muafaka.
“Naweza kuthibitisha kwamba, Yanga imeonesha nia ya kumchukua Donald Ngoma, mazungumzo yameanza lakini hakuna makubaliano yaliyofikiwa hadi sasa,” alisema Chizondo.
Mshambuliaji tegemeo wa FC Platinum, Donald Ngoma yuko mbioni kutua kwa vigogo wa Tanzania, Yanga SC kutoka timu ya Zvishavane.
Ngoma, ambaye mkataba wake unamalizika Platinum mwishoni mwa msimu ujao, aliivutia Yanga wakati timu hizo zilipokutana katika mchezo wa 32 Bora Kombe la Shirikisho Afrika.
Yanga iliitoa FC Platinum kwa jumla ya mabao 5-2, ilishinda 5-1 Uwanja wa Taifa, Dar es Salaam kabla ya kufungwa 1-0 Uwanja wa Mandava huko Zvishavane.