Jangwani wampokea kifalme Singano ‘Messi’

  KIUNGO mshambuliaji wa Simba, Ramadhani Singano ‘Messi’ jana alilakiwa kwa mbwembwe na mashabiki wa Yanga wakati alipofika makao makuu ya Shirikisho la Soka Tanzania (TFF), kwa ajili ya usuluhishi wa suala la madai ya kughushiwa kwa mkataba wake.
Messi alifika uwanjani hapo akiwa sambamba na Mwenyekiti wa Sputanza, Mussa Kisoky na kukutana na kundi kubwa la mashabiki wa Yanga waliofika uwanjani hapo kwa ajili ya kutazama mazoezi ya timu yao yaliyoanza jana kwenye uwanja wa Karume Dar es Salaam.
Baada ya mashabiki hao kumuona mchezaji huyo wakaanza kumshangilia huku wakiimba Messi,Messi,Messi na wengine wakitaka kumvalisha jezi ya Yanga lakini zoezi hilo lilishindikana kwa sababu alikuwa ndani ya gari.
Akizungumza kwa ufupi juu ya sakata hilo lililosababisha kuingia kwenye chumba cha usuluhishi na viongozi wa timu yake, Messi alisema anafurahi kuitwa sehemu hiyo kwa sababu haki yake itapatikana na kila kitu kitakuwa wazi.
Baada ya kuzungumza maneno hayo mashabiki waliokuwa wamejazana walianza kumshangilia tena mchezaji huyo wenye gari na kuwashukuru kwa upendo waliomuonesha.
“Nawashukuru kwa upendo mlionionesha najua siyo kitu rahisi kwa mashabiki wa Yanga kumshangilia mchezaji wa Simba na mimi nilijua nitazomewa lakini sapoti mliyonipa imenipa faraja kwa hiyo nawashukuru,”alisema Messi na kurudi ndani ya gari lililomleta TFF.
Kamati ya Sheria na Hadhi za wachezaji ya TFF, ilizitaka pande zote mbili yani Messi na uongozi wa klabu ya Simba kukaa pamoja jana, kwa ajili ya kumaliza utata uliokuwepo juu ya sakata la kufojiwa kwa mkataba wa mchezaji huyo.
Messi anasema mkataba wake wa kuichezea Simba unamalizika mwaka 2015 yaani mwishoni mwa msimu uliopita huku Kamati ya Usajili ya Simba chini ya Mwenyekiti wake Zacharia Hans Poppe, ikidai mchezaji huyo mkataba wake unamalizika mwishoni mwa msimu ujao.