Yanga kusajili 5 kimataifa

  UONGOZI wa klabu ya Yanga umesema hadi kufikia Juni 16 utakuwa umekamilisha usajili wa wachezaji watano wa kimataifa ili iweze kuwatumia kwenye michuano ya Kombe la Kagame.
Akizungumza na gazeti hili Katibu Mkuu wa Yanga, Dk Jonas Tiboroha, alisema wapo katika hatua nzuri kukamilisha usajili wa wachezaji hao na baada ya Kamati ya Mashindano kupitisha idadi ya klabu kusajili wachezaji 10 kutoka nje ya Tanzania watayaweka hadharani majina yao.
“Tuna uhakika Kamati ya mashindano itayapitisha mapendekezo yetu kwa sababu bodi ya Ligi tayari imeridhia lengo letu ni kuongeza ushindani kwenye ligi yetu lakini pia kuwapa changamoto wachezaji wazawa,”alisema Tiboroha.
Katibu huyo alisema katika usajili wa nyota hao nguvu zao wamezielekeza kwenye mataifa manne ambayo ni Zimbabwe,Ghana,Ivory Coast,Nigeria na Sierra Leone.
Tiboroha alisema katika usajili huo mpya hakuna hata mchezaji ambaye amewahi kucheza Ligi ya Tanzania na nyota hao wanatarajia kuanza kuwasili nchini kuanzia mwishoni mwa wiki hii kwa ajili ya kukamilisha mambo ya usajili.
“Tumekuwa makini katika usajili huo wa kimataifa kama tulivyofanya wa hapa nyumbani kwa kuzingatia ugumu wa mashindano ambayo tunakwenda kushiriki kuanzia msimu ujao na katika usajili huo hakuna mchezaji yeyote aliyewahi kucheza ligi ya Tanzania,”alisema Tiboroha.
Katika hatua nyingine, jumla ya wachezaji saba walihudhuria mazoezi ya kwanza jana asubuhi kwenye uwanja wa Karume chini ya kocha Mkuu Hans van der Pluijm.

Wachezaji hao ni Rajabu Zahiri, Hussein Javu,Patto Ngonyani Said Juma, kipa mpya Benedictor Tinoco aliyesajiliwa kutoka Kagera Sugar, Geofrey Mwishuhuya na Lansana Kamara raia wa Sierra Leone.
Kocha Pluijm alisema amefurahishwa na nidhamu iliyooneshwa na wachezaji hao kwa kuitikia mwito wa kuhudhuria mazoezi siku ya kwanza na kusema ana imani hadi kukamilika kwa wiki hii kikosi chake kitakuwa kimekamilika kwa idadi kubwa ya wachezaji kuanza mazoezi.
“Nawapongeza wachezaji waliofika leo (jana), ikiwa ni siku ya kwanza, lengo langu nikuwa na kikosi imara ambacho kitatuwezesha kutetea ubingwa wetu na hilo linawezekana kutokana na usajili tulioufanya ukijumuisha na wachezaji wa kimataifa wanao tarajia kujiunga nasi siku za karibuni,”alisema Pluijm.