Afisa mwandamizi wa uchaguzi Burundi atoroka nchi

                                                                               Naibu Mkuu wa Tume ya Uchaguzi Burundi ametoroka nchi kabla ya uchaguzi wa bunge na rais huku mgogoro wa kisiasa ukiendelea kutokota katika nchi hiyo kufuatia uamuzi wa rais Pierre Nkurunziza kuwania urais kwa muhula wa tatu.

Bi. Spes-Caritas Ndironkeye anajiunga na jaji mwandamizi pamoja na wakimbizi wengine wa kisiasa ambao wametoroka Burundi wakihofia maisha yao baada ya kufeli jaribio la kumpindua Nkurunziza. Jamaa yake Ndironkeye anasema alitoroka akiwa na binti yake na kuelekea pahala pasipojulikana. Msemaji wa Tume ya Uchaguzi Burundi inayojulikana kama CENI, Prosper Ntahorwamiye, amesema tume hiyo imepokea habari hizo lakini akaongeza kuwa hakuna ushahidi kuhusu Ndironkeye kutoroka nchi. Aidha haijabainika kuwa iwapo kutokuwepo Ndironkeye kutaathiri uchaguzi wa bunge na serikali za mitaa uliopangwa kufanyika wiki ijayo au uchaguzi wa rais Juni 26. Leo polisi wameonekana wakipiga doria katika maeneo mbali mbali ya mji mkuu wa Burundi, Bujumbura. Viongozi wa Jumuiya ya Afrika Mashariki wanatazamiwa kukutana kesho nchini Tanzania kujadili mgogoro wa Burundi.