Joto kali laua karibu watu 2,000 nchini India

                                                                                  Takribani watu 2,000 wamepoteza maisha nchini India kutokana na joto kali ambalo limeikumba nchi hiyo katika kipindi cha wiki moja iliyopita.

Vifo vingi vimetokea kwenye majimbo ya kusini ya Andhra Pradesh na Telangana. Kiwango cha joto katika mikoa hiyo miwili kimefikia nyuzi 47, huku halijoto kwenye mji mkuu wa India New Delhi ikifikia nyuzi 45.  Lakini habari ambazo hazikuthibitishwa zinasema kuwa kuna uwezekano kuwa kiwango cha joto kimepanda na kufikia nyuzi 50.

Vifo pia vimeripotiwa katika mkoa wa magharibi wa Gujarat, ambapo inasemekana kuwa watu wengi waliofariki ni wale wasio na makazi na vibarua. Mamlaka ya hali ya hewa nchini India imetabiri kuwa, joto kali litaendelea nchini humo kwa siku mbili zaidi.

Serikali katika mikoa ya kusini imewataka watu wasitoke nje wakati wa jua kali, na maofisa wa afya wamependekeza watu wanywe maji kwa wingi kabla ya kutoka nje. Watalaamu wa masuala ya tiba wamesema kuwa vifo hutokea kutokana na mwili kukosa maji. Hali kama hii iliwakumba zaidi watu masikini na wasio na makazi nchini India mwaka 2003 ambapo watu 1,400 walikufa kutokana na joto kali.