Boko Haram washambulia tena, waua watu 11 Nigeria

                                                                             Wanamgambo wa kundi la kigaidi na kitakfiri la Boko Haram wameua watu wasiopungua 11 katika shambulio walilofanya mapema leo kwenye viunga vya mji wa Maiduguri, makao makuu ya jimbo la Borno, lililoko kaskazini mashariki mwa Nigeria. Hayo ni kwa mujibu wa wakaazi wa eneo hilo pamoja na duru za usalama za Nigeria. Shambulio hilo limefanywa siku moja tu baada ya kuapishwa rais mpya wa Nigeria Muhammadu Buhari ambaye ameapa kulitokomeza kundi hilo la kigaidi na kitakfiri na kuchukua hatua ya kuhamishia huko Maiduguri makao makuu ya uongozaji wa operesheni za kijeshi yaliyokuwa mji mkuu Abuja. Milio ya risasi ya silaha za kisasa ilisikika usiku wa manane wa kuamkia leo katika eneo la kusini magharibi mwa mji wa Maiduguri. Kwa mujibu wa Mohammed Bunu, mmoja wa wanamgambo wa kujitolea, kombora la kundi la kigaidi la Boko Haram lililenga nyumba moja katika eneo la Bulumkutu na kuua watu watano, huku maiti nyengine sita zikiokotwa katika maeneo mengine tofauti. Shambulio hilo la leo linafuatia shambulio la miripuko miwili ya mabomu la hapo jana katika mji wa Tashan Alade ambalo liliua watu wasiopungua saba. Maelfu ya watu wameuawa na wengine wapatao milioni moja na nusu wamebaki bila makaazi tangu kundi la kigaidi na kitakfiri la Boko Haram lilipoanzisha uasi nchini Nigeria miaka sita iliyopita…/