“Uhalifu waliofanya askari wa kigeni CAR uchunguzwe”

                                                        Kamishna Mkuu wa Haki za Binadamu wa Umoja wa Mataifa ametaka ufanyike uchunguzi zaidi kuhusu utumiaji mbaya wa kijinsia uliofanywa na askari wa nchi tofauti za kigeni dhidi ya watoto katika Jamhuri ya Afrika ya Kati. Zeid Ra'ad Al Hussein amesema leo kuwa baada ya kutolewa ripoti kuhusiana na utumiaji mbaya wa kijinsia waliofanyiwa watoto nchini humo na askari wa kulinda amani wa Ufaransa, nchi nyingine nyingi zimetakiwa zifanyiwe uchunguzi juu ya madai yalioyotolewa ya utumiaji mbaya wa kijinsia na mauaji ya watu wasio na hatia yaliyofanywa na askari wa nchi hizo wanaolinda amani chini ya mwamvuli wa Umoja wa Mataifa. Imeelezwa kwamba zimetolewa tuhuma nzito dhidi ya askari wa nchi nyengine pia zikiwemo za mauaji, utekaji nyara na utumiaji mbaya wa kijinsia. Kwa mujibu wa Kamishna Mkuu wa Haki za Binadamu wa Umoja wa Mataifa mbali na askari wa Ufaransa, kuna ripoti zinazohusisha askari wa nchi nyengine pia waliohusika na utumiaji mbaya wa kijinsia. Mwishoni mwa mwezi uliopita wa Aprili, gazeti la The Guardian liliripoti kuwa katika kipindi cha kati ya Disemba mwaka 2013 hadi Juni 2014 wakati wa operesheni ya kijeshi katika mji mkuu wa Jamhuri ya Afrika ya Kati, Bangui askari wa Ufaransa waliokuwa wametumwa nchini humo waliwafanyia vitendo vichafu vya kuwabaka na kuwalawiti watoto wadogo wa kiume wenye umri hata wa miaka tisa ili kuwagaia pesa na chakula…/