Makinda aitaka Serikali kutekeleza bajeti 2015/16

SPIKA Anne Makinda ameitaka Serikali kuhakikisha bajeti ya mwaka 2015/16 inatekelezwa ipasavyo. Makinda alitoa kauli hiyo bungeni mjini hapa jana wakati alipokuwa akiahirisha Bunge muda mfupi baada ya Waziri wa Fedha Saada Mkuya Salum, kumaliza kusoma bajeti ya Serikali ya mwaka 2015/16.
Alisema: Hii ni bajeti ya mwisho kabla ya kuingia kwenye uchaguzi mkuu, sisi tutafanya kazi yetu kadri inavyowezekana kuhakikisha bajeti hii inatekelezeka, kipindi chetu karibu kinakwisha ila serikali itakuwepo madarakani bado, hivyo tunaiomba utekelezaji wa bajeti hii,” alisema.
Alisema bajeti hiyo itajadiliwa kwa muda wa siku 7 kwa wabunge kutoa maoni yao, huku akiwataka wabunge ambao hawajajaza fomu kwa ajili ya kupata nafasi ya kuchangia kufanya hivyo mara moja kwani bila hivyo hawatapata fursa hiyo.
Aidha, Makinda aliwaonya wabunge kuacha kutukanana wakati wa mjadala wa bajeti kwani si tabia njema na badala yake wajikite katika kuchangia bajeti ya serikali ili kufikia malengo.
“Pia muache tabia ya utoro hata kama mna homa ya uchaguzi, ni vyema kuhakikisha mnakuwapo muda wote wa mjadala. Katika hatua nyingine, baadhi ya wabunge ametoa maoni tofauti ya bajeti huku wengine wakisifia na wengine wakilalamika kuongeza tozo katika mafuta ya petroli, mafuta ya taa na dizeli.
Mbunge wa Mtera, Livistone Lusinde (CCM) alisema yeye kama mbunge anayewakilisha wananchi wa vijijini wenye kipato cha chini hawezi kukubali serikali ikaongeza gharama kwenye mafuta, kwani hatua hiyo itwaumiza zaidi wananchi wa vijijini.
“Pamoja na kuongeza tozo ya mafuta ni katika kuongeza mapato, lakini itawaumiza watumiaji hususan wa vijijini na si wachakachuaji wa mafuta hayo,” alisema na kusisitiza kuwa njia pekee ni kuweka adhabu kali kwa wachakachuaji wa mafuta.
Naye Mbunge wa Kawe, Halima Mdee(Chadema) alisema kuongeza fedha katika Mfuko wa Wakala wa Nishati vijijini ni jambo jema lakini kuna haja ya kuhakikisha fedha hizo zinatolewa kwani katika bajeti ya mwaka jana fedha zilizotengwa chini ya asilimia 50 ndizo zilizopelekwa REA.
Aidha, alionesha wasiwasi wake kwa wabunge kunyimwa meno katika kupitia misamaha ya kodi kabla ya serikali kuikubali na kuipitisha, huku akisema jambo hilo ni hatari kwani serikali inaongoza kwa kutoa misamaha ya kodi.
Mbunge wa Viti Maalumu, Ester Bulaya (CCM) alisema kitendo cha kuongeza gharama kwenye mafuta ni kuwaumiza wanyonge na kusababisha migomo isiyo ya lazima kwani hali hiyo itasababisha gharama za nauli kupanda.
Naye Mbunge wa Viti Maalumu, Zarina Madabida (CCM), alipongeza hatua ya serikali kubadilisha mfumo na kuacha kuongeza bei kwenye pombe, sigara, vinywaji baridi kama ilivyozoeleka miaka yote huku akisema bajeti hiyo ni nzuri.