Wafanyakazi wakumbukwa

SERIKALI imeendelea kuwapa ahueni wafanyakazi nchini baada ya kupunguza kiwango cha Kodi ya Mishahara (PAYE) kutoka asilimia 12 katika mwaka wa fedha uliopita hadi asilimia 11.
Hayo yalidhihirika jana kupitia Bajeti ya Serikali kwa mwaka wa fedha 2015/16 iliyosomwa bungeni mjini Dodoma jana na Waziri wa Fedha, Saada Mkuya Salum. Katika bajeti inayomalizika, Serikali ilipunguza pia kodi hiyo kutoka asilimia 13 hadi 12.
Ingawa Shirikisho la Wafanyakazi (TUCTA) limekuwa likitaka kodi hiyo ipungue hadi kufikia asilimia 10, Serikali imekuwa ikipunguza kiwango hicho kutoka asilimia 18 mwaka 2006/7 hadi sasa kufikia asilimia 11 ambayo ni sawa na punguzo la asilimia 35.
Waziri Mkuya alisema Serikali imekuwa ikijitahidi kuboresha maslahi ya watumishi wa umma ikiwa ni pamoja na kuongeza mshahara wa kima cha chini kutoka Sh 65,000 mwaka 2005 hadi kufikia Sh 265,000 mwaka 2014/15 ikiwa ni ongezeko la asilimia 307.7.
Kuhusu pensheni kwa wastaafu, Waziri alisema katika mwaka huu wa fedha 2015/16, serikali itaongeza kima cha chini cha pensheni kwa wastaafu wa Serikali kwa mwezi kutoka Sh 50,000 hadi Sh 85,000, sawa na ongezeko la asilimia 70.
“ Serikali inatambua umuhimu wa wastaafu ambao walitoa mchango mkubwa kwa taifa hili na ndio maana, kwa kuzingatia hilo, serikali imeongeza pensheni yao,” alisema.
Akizungumzia mafao kwa wazee, Waziri Mkuya alisema Serikali kwa kutambua mchango wao pia katika kujenga taifa hili, imedhamiria kwa dhati kuwalipa mafao ya kila mwezi.
Ili kufanisha zama hiyo alisema serikali imeanza zoezi la kuandaa mfumo na utaratibu wa kuwatambua wazee wote nchini ili kupata idadi kamili ya wazee na kuhakikisha kwamba mafao yanawafikia walengwa kwa wakati.
“Kwa kuzingatia hilo, katika mwaka 2015/16, Serikali inatarajia kuanza maandalizi ya kuwezesha kufanya malipo hayo. “Maandalizi hayo ni pamoja na kutunga Sheria stahiki, kuwatambua kupitia Serikali za Mitaa kwa kutumia mfumo shirikishi jamii na kuweka utaratibu wa kuwalipa,” alisema.