Waislamu Russia wataka maeneo ya wanawake pwani

Pendekezo la jumuiya za Kiislamu nchini Russia kwa ajili ya kutengwa maeneo ya wanawake na wanaume katika pwani za mito ya mji wa Moscow, kwa ajili ya mapumziko, limeungwa mkono na viongozi wa dini nyingine nchini humo. Albir Karganoff, naibu mkuu wa idara ya kidini kwa ajili ya Waislamu wa Russia na mjumbe wa kamisheni ya uratibu wa mahusiano baina ya makundi ya kidini na kaumu nchini humo, amesema kuwa tayari pendekezo hilo limewasilishwa kwa viongozi wa serikali mjini Moscow. Amesema kuwa, kuasisiwa maeneo hayo kutasaidia kuepusha uharibifu wa maadili hususan kwa wanawake na wanaume wanaotembelea maeneo hayo. Karganoff amesisitiza kuwa, kutengwa maeneo ya starehe baina ya wanawake na wanaume ni jambo muhimu kwa wakazi hasa kwa kutilia maanani kwamba, kunatoa uhuru kwa watu kufika maeneo hayo kinyume na ilivyo hivi sasa. Aidha amesema baadhi ya nchi kama vile Uturuki na Ujerumani tayari zimekwishaanzisha maeneo kama hayo kwa ajili ya usalama wa wanawake na wanaume, suala ambalo limekuwa na taathira chanya kwa watumiaji. Pendekezo hilo la Waislamu tayari limetiwa saini na kamati ya mahusiano ya kijamii ya Kanisa la Orthodox nchini Russia na taasisi ya jumuiya ya Mayahudi na Mabudha wa nchi hiyo, ambapo inatazamiwa kutiwa saini pia na serikali.