Watu 16 wauawa katika mlipuko wa bomu Nigeria

Watu 16 wameripotiwa kuuawa katika mlipuko wa bomu uliotokea jana usiku nchini Nigeria. Kwa mujibu wa duru za jeshi na hospitali nchini humo, shambulio hilo lilitokea katika soko lililokuwa limefurika watu katika jimbo la Borno kaskazini mashariki mwa Nigeria. Mbali na watu 16 kuuawa, wengine kadhaa wamejeruhiwa baadhi wakiwa mahututi.  Hadi sasa hakuna kundi lolote lililotangaza kuhusika na hujuma hiyo, ingawa kama kawaida lawama zimeelekezwa kwa kundi la kigaidi na kitakfiri la Boko Haram ambalo limekuwa likitekeleza vitendo kama hivyo. Hayo yanajiri katika hali ambayo makamanda wa jeshi la Nigeria walikutana jana na makamanda wenzao wa nchi nne jirani na taifa hilo kwa ajili ya kujadili njia za kukabiliana na kundi la kigaidi na kitakfiri la Boko Haram. Maafisa hao wa jeshi la Nigeria walikutana mjini Abuja, mji mkuu wa nchi hiyo na makamanda kutoka Cameroon, Niger, Chad na Benin ambapo pamoja na mambo mengine walikubaliana kuanzisha kikosi cha eneo kitakachokuwa chini ya Umoja wa Afrika kwa lengo la kuliangamiza kabisa kundi hilo la kigaidi. Mbali na hayo serikali ya Nigeria pia imehamishia kituo cha uongozi wa kijeshi huko Maiduguri, makao makuu ya jimbo la Borno, ambalo ni ngome ya kundi hilo ili kukabiliana vilivyo na wapiganaji wa Boko Haram.