Iran yamiliki teknolojia ya kusafisha maji ya chumvi

Jamhuri ya Kiislamu ya Iran imefanikiwa kumiliki teknolojia ya kisasa kabisa ya kusafisha maji ya chumvi na kuyafanya yawe matamu ya kunywa.
Kwa msingi huo, Iran sasa imevunja ukiritimba wa teknolojia hiyo iliyokuwa ikihodhiwa na Marekani, Ujerumani, Japan na Korea Kusini.
Kwa mujibu wa Shirika Rasmi la Habari la Iran, IRNA, teknolojia hii imezinduliwa na Taasisi ya Petrokemikali, Utafiti na Teknolojia ya Iran. Katika hafla iliyofanyika Jumamosi alasiri, taasisi hiyo imezindua teknolojia hiyo nadra inayotumia mbinu ijulikanayo kama Osmosis Membrane kwa kipimo cha 4040. Imedokezwa kuwa mzunguko wote wa teknolojia hiyo ni wa hapa nchini na kwamba chombo hicho kwa sasa kina uwezo wa kuzalisha takribani lita 9,000 za maji matamu kwa siku.
Aidha chombo hicho kina uwezo kwa kubadilisha maji ya chumvi baharini na aina mbali mbali za maji machafu kuwa maji safi na matamu kwa ajili ya matumizi ya kila siku ya mwanadamu. Kwa kuzingatia hitajio kubwa la maji masafi katika maeneo mbali mbali duniani, kumiliki uwezo wa teknolojia hiyo ni hatua muhimu sana kwa Iran kwa matazamo wa kiuchumi na kistratijia. Bei ya chombo hicho kilichotengenezwa Iran ni nafuu zaidi kwa asilima 50 ikilinganishwa na aina sawa na hiyo inayozalishwa na nchi za kigeni.