“Ufumbuzi wa kila kitu utegemee uwezo wa ndani”

Kiongozi Muadhamu wa Mapinduzi ya Kiislamu Ayatullahil Udhma Sayyid Ali Khamenei amesema misimamo ya nyuklia ya Iran ni ile ile iliyotangazwa mara kadhaa hadharani. Ayatullah Khamenei ametoa sisitizo hilo leo mbele ya hadhara ya Spika na wawakilishi wa Majlisi ya Ushauri ya Kiislamu alipoashiria kadhia ya nyuklia na kubainisha kwamba “misimamo yetu katika masuala ya nyuklia ni maelezo yale yale ambayo tumewaeleza wananchi hadharani na ndio hayo hayo tuliwaeleza kama yalivyo viongozi kwa mdomo na kwa maandishi.” Kiongozi Muadhamu wa Mapinduzi ya Kiislamu amesisitiza kuwa viongozi na wawakilishi wa Iran kwenye mazungumzo wanafanya kazi ngumu na kwa jitihada kubwa na kuongeza kwamba wao wanapaswa kuchachamaa na kusimamia misimamo ile ile iliyotangazwa; nasi tuna matumaini kwamba wataweza kudhamini maslahi ya nchi na Mfumo. Ayatullah Khamenei ameeleza pia kwamba kuna njia kadhaa za ufumbuzi wa kadhia ya nyuklia ambazo zote zinategemea jinsi tutakavyozingatia zaidi uwezo wa ndani na kuimarisha uzalishaji. Amesema katika masuala yaliyopo baina ya Iran, Marekani, Magharibi na Uzayuni, mbali na kadhia ya nyuklia kuna masuala mengine mtawalia likiwemo la haki za binadamu yanayotarajiwa kuibuka; lakini kama uwezo uliopo utaelekezwa ndani na kutatua matatizo, utatuzi wa masuala hayo pia utakuwa rahisi. Katika sehemu nyengine ya hotuba yake, Kiongozi Muadhamu wa Mapinduzi ya Kiislamu ametilia mkazo maelewano baina ya Bunge na mihimili mingine ya dola hususan Serikali na kusisitiza kwamba ufunguo wa utatuzi wa matatizo ya kiuchumi ya Iran na vilevile kadhia ya nyuklia ni kutegemea uwezo wa ndani na kuukubali kwa dhati uchumi wa muqawama. Ameongeza kuwa hakuna mkwamo wowote nchini na dawa ya matatizo ni kuimarisha uzalishaji wa ndani na kuchunga utumiaji wa fedha. Ayatullah Khamenei aidha amesema serikali ni kiunganishi kati ya mihimili ya dola na vyombo vingine; na utendaji wake wa mafanikio utakuwa na taathira njema katika harakati ya vyombo vingine, kwa hivyo kuwa na maelewano na serikali ni lazima na ni dhihirisho halisi la kuwa kitu kimoja na kuwa na kauli moja…/