Hofu ya kushambuliwa waandishi yatanda Nigeria

Wanaharakati wa vyombo vya habari nchini Nigeria wameingiwa na wasiwasi kutokana na kuongezeka mashambulio ya vyombo vya usalama vya serikali dhidi ya waandishi wa habari. Jumuiya na asasi za kutetea waandishi wa habari zimeingiwa na wasiwasi huo baada ya waandishi wanne wa habari kushambuliwa ndani ya kipindi cha wiki moja. Muhammad Atta-Kaffin-Dangi, ni mmoja wa waandishi hao wa habari ambaye alishambuliwa na polisi katika mji wa Gwagwalada kwa kisingizio cha kuandaa ripoti bila ya kuwa na kibali. Victor Akinkuolie, ni mwandishi mwengine wa habari ambaye naye pia ameshambuliwa na vikosi vya usalama ambapo kabla yake alishakabiliwa na vitisho mara kadhaa. Joseph Hir na  Kamarudenn Ogundele ni waandishi wengine wawili wa habari walioshambuliwa katika kipindi cha juma hili katika maeneo tofauti ya Nigeria na wafuasi na watu wa karibu wa viongozi wa majimbo. Vitendo vya utumiaji nguvu dhidi ya waandishi wa habari vimeitia wasiwasi kamati ya kulinda waandishi wa habari yenye makao yake mjini New York, Marekani. Kamati hiyo imemtaka rais mpya wa Nigeria Muhammadu Buhari aanzishe uchunguzi kuhusiana na kushambuliwa waandishi wanne hao wa habari pamoja na kuchukua hatua za kuhakikisha uhuru wa magazeti na vyombo vya habari nchini humo unalindwa