Rwasa: Uchaguzi Burundi uwe umeshafanyika Agosti

Kiongozi wa upinzani nchini Burundi Agathon Rwasa amesema uchaguzi wa rais lazima uwe umefanyika ifikapo mwezi Agosti, hata hivyo amesisitiza kwamba uchaguzi hauwezi kuwa huru na wa haki pasina kuwepo usalama na vyombo huru vya habari. Uwezekano wa uchaguzi wa rais kufanyika tarehe 26 mwezi huu wa Juni unaonekana kuwa mdogo kutokana na kuendelea maandamano kwa zaidi ya mwezi mmoja sasa ya kupinga uamuzi wa Rais Pierre Nkurunziza wa kuamua kugombea urais kwa muhula wa tatu. Tayari uchaguzi wa bunge na wa serikali za mitaa umeakhirishwa kutokana na machafuko ambayo hadi sasa yamesha sababisha vifo vya watu zaidi ya 30. Rwasa, ambaye naye pia ni mgombea katika uchaguzi wa rais amesema ni lazima uchaguzi wa rais uwe umefanyika ifikapo tarehe 26 ya mwezi Agosti wakati kipindi cha sasa cha urais kitakapomalizika. Rwasa amesisitiza kuwa hakuna nafasi kwa ajili ya serikali ya mpito. "Ni wajibu kwa wote kuheshimu katiba kwa kuzingatia kwamba ilikuwa ikifahamika tokea kabla kuwa hadi ifikapo tarehe hiyo rais na wabunge wapya wanapaswa wawe wamechaguliwa", amesema. Tume ya uchaguzi ya Burundi CENI ilitangaza siku ya Jumatano iliyopita uamuzi wa kuakhirisha chaguzi za bunge na serikali za mitaa pasina kueleza chochote kuhusu uchaguzi wa rais