Rais wa Sudan atangaza baraza lake jipya la mawaziri

                                            Rais Omar al-Bashir wa Sudan ameunda serikali mpya, mwezi mmoja tangu alipopata ushindi mkubwa katika uchaguzi wa rais uliosusiwa na upinzani na kutawaliwa na madai ya kufanyika udanganyifu. Al Bashir alitangaza baraza lake jipya la mawaziri hapo jana ambapo amemteua msaidizi wake Ibrahim Ghandour kuwa Waziri wa Mambo ya Nje na Mohamed Zayed kuwa Waziri wa Mafuta. Rais wa Sudan mwenye umri wa 71 amemwondoa pia waziri wake wa ulinzi wa muda mrefu Abdulrahim Mohamed Hussein na kumteua Mkuu wa majeshi Luteni Jenerali Mustafa Othman Obeid kuwa waziri mpya wa ulinzi. Al Bashir aidha amewabakisha katika yadhifa zao makamu wake wawili Bakri Hassan Saleh na Hassabo Mohamed Abdelrahman. Kwa mujibu wa shirika la habari la serikali la al-Sudan serikali mpya ya Al Bashir itakuwa na jumla ya mawaziri 31. Aidha mapema leo Rais wa Sudan ametoa dikrii ya kuteua magavana wa majimbo 18 ya nchi hiyo ambapo waziri wa zamani wa ulinzi Abdulrahim Mohamed Hussein ameteuliwa kuwa gavana wa jimbo la Khartoum. Al-Bashir alichaguliwa tena kuwa rais wa Sudan katika uchaguzi uliofanyika mwezi Aprili baada ya kujipatia asilimia 94 ya kura. Wakati alipokula kiapo cha urais, Rais wa Sudan aliahidi kufungua ukurasa mpya kwa ajili ya nchi hiyo na kurejesha uhusiano na madola ya Magharibi pamoja na kupambana na ufisadi. Omar Hassan Al Bashir, aliingia madarakani mwaka 1989 kupitia mapinduzi ya kijeshi