Basi la Stars lapigwa mawe Dar

Basi la Taifa Stars.

TIMU ya taifa, Taifa Stars, iliwasili salama jana Jumanne ikitokea Misri ilipokwenda kucheza na timu ya taifa ya Misri kuwania kufuzu michuano ya Afcon 2017 na kuambulia kipigo cha mabao 3-0, lakini imekumbwa na dhahama ya basi lao kupigwa mawe.
Basi la Stars lilikumbwa na tatizo hilo juzi Jumatatu jioni maeneo ya Kariakoo lilipokuwa likiwapeleka wachezaji wa U-23 kambini kwenye Hoteli ya Tansoma baada ya kutoka kufanya mazoezi kwenye Uwanja wa Karume, Dar.
Mashuhuda walioshuhudia tukio hilo walieleza kwamba, basi hilo lilirushiwa chupa na mawe yaliyosababisha kuvunjika kwa kioo kimoja cha basi lakini zaidi hakuna aliyedhurika.
Chanzo cha vurugu hizo imeelezwa kuwa ni mashabiki wa soka kuchukizwa na kipigo cha Stars dhidi ya Misri.
Inadaiwa kuwa, gari hilo lilipofika maeneo ya Kariakoo, mashabiki kadhaa walianza kuzomea, lilipoendelea mbele zaidi, wengine wakafikia hatua ya kulirushia mawe na chupa.
Wakati huohuo, imefafanuliwa kuwa Stars iliyowasili jana inatarajia kuelekea visiwani Zanzibar siku chache zijazo kwa ajili ya kuweka kambi ya mchezo wao wa kufuzu michuano ya Kombe la Mataifa ya Afrika kwa Wachezaji wa Ndani (Chan) dhidi ya Uganda. Mchezo huo unatarajiwa kupigwa kwenye Uwanja wa Amaan, Zanzibar Juni 20, mwaka huu.
Ofisa Habari wa Shirikisho la Soka Tanzania (TFF), Baraka Kizuguto, alisema: “Tunashukuru timu imewasili salama na sasa kikosi kipo kwenye mchakato wa kuelekea Zanzibar kwa ajili ya kuweka kambi ya mchezo dhidi ya Uganda utakaopigwa Zanzibar.”