Dar es Salaam mabingwa Umisseta Taifa

MICHUANO ya Umoja wa Michezo ya Shule za Sekondari Tanzania (UMISSETA) Taifa imemalizika jana jijini Mwanza kwa mchezo wa fainali kati ya Dar es Salaam dhidi ya Nyanda za Juu Kusini wavulana huku fainali nyingine kwa upande wa wasichana ikipigwa kati ya Dar es Salaam dhidi ya Kanda ya Mashariki.
Katika fainali ya wasichana, Dar es Salaam walitawazwa mabingwa baada ya kuwatandika bila huruma Mashariki kwa mabao 7-1 kwenye mchezo uliokuwa na msisimko mkubwa kwa Dar es Salaam kuonesha uwezo mkubwa.
Dar es Salaam ilitinga fainali baada ya kuisukumiza nje Kanda ya Ziwa mabao 4-1 huku Mashariki ikitinga katika fainali baada ya kuifunga Kaskazini kwa mabao 3-1.
Kwa upande wa fainali ya wavulana, Nyanda za Juu Kusini walitawazwa mabingwa baada ya kuifunga Dar es Salaam bao 1-0, wakijifunga baada ya mabeki wa Dar es Salaam kujichanganya katika harakati za kuokoa hatari langoni mwao.
Nyanda za Juu Kusini walitinga fainali baada ya kuifunga Kanda ya Ziwa kwa mabao 3-0 huku Dar es Salaam wakitinga hatua hiyo baada ya kuifunga Zanzibar ambao ndio walikuwa mabingwa watetezi kwa mabao 4-3.
Chama cha Soka Mkoa wa Dar es Salaam (DRFA) chini ya Mwenyekiti wake Almas Kasongo, kimeelezwa kufurahishwa kwake na mafanikio yaliyooneshwa na vikosi hivyo vilivyo katika himaya yake.
Imeziomba klabu za ligi mbalimbali kujitokeza kuangalia mashindano ya vijana ili kupata wachezaji wao wa baadaye.