Nyumba za walimu zajengwa kwa bilioni 14/-

SERIKALI imetoa kupitia Mpango wa Maendeleo ya Elimu ya Msingi (MMEM) na Sekondari (MMES) Sh bilioni 13.9 kwa ajili ya ujenzi wa nyumba za walimu nchini kati ya mwaka 2009 hadi mwaka 2013.
Kati ya fedha hizo, Sh milioni 168.6 zilipelekwa katika Halmashauri zilizopo katika mkoa wa Dar es Salaam.
Naibu Waziri, Ofisi ya Waziri Mkuu, Tawala za Mikoa na Serikali za Mitaa (Tamisemi), Kassim Majaliwa alisema jana kuwa Serikali kupitia MMEM na MMES imekuwa ikitenga fedha kwa ajili ya ujenzi wa nyumba za walimu kwa halmashauri zote.
Aidha, alisema serikali kupitia mpango wa kuboresha makazi kwa watumishi, imeunda kampuni ya ujenzi wa nyumba za watumishi (Watumishi Housing Company).
Alisema kampuni hiyo inamilikiwa kwa ubia na mifuko ya hifadhi ya jamii, Shirika la Nyumba la Taifa (NHC) na Mfuko wa Taifa wa Bima ya Afya (NHIF) ambayo inatoa nafuu ya ujenzi kwa nyumba hususan kwa watumishi wenye kipato cha chini.
“Hivi sasa watumishi wa mikoa 12 wameshaanza kupata huduma hii ikiwemo Dar es Salaam, Morogoro, Arusha, Lindi na Pwani,” alisema Majaliwa.
Alisema serikali kupitia mfuko wa mikopo ya nyumba kwa watumishi uliopo Wizara ya Ardhi inawakopesha watumishi wa umma wakiwemo walimu fedha za ujenzi kwa riba ya asilimia tatu kwa ajili ya ujenzi wa nyumba.
Naibu Waziri alikuwa akijibu swali la Mbunge wa Viti Maalumu, Mariam Kisangi (CCM), lililoulizwa kwa niaba yake na Mbunge wa Masasi, Mariam Kasembe (CCM).
Katika swali hilo, Kisangi alitaka kufahamu kwa nini serikali isiwape kipaumbele walimu katika mpango wa kuboresha makazi na isiwaunganishe moja kwa moja na benki zinazotoa mikopo ya nyumba kwa gharama nafuu.
Akijibu swali la nyongeza la Mbunge wa Viti Maalumu, Susan Lyimo (Chadema), Naibu Waziri alisema kila Halmashauri hupewa Sh milioni 500 kwa ajili ya ujenzi wa nyumba za walimu nchini na wataendelea kutenga fedha.
Chanzo Habarileo