Cheyo aimwagia sifa bajeti.

WAKATI baadhi ya wabunge wakisema hatua ya serikali kutaka kuongeza kodi kwenye mafuta itapanda gharama za maisha na kuongeza ugumu wa maisha kwa Watanzania, Mbunge wa Bariadi Mashariki, John Cheyo (UDP) ameimwagia sifa bajeti na kusema wakati umefika wa kuondokana na serikali ya vibatari na koroboi.
Akichangia mjadala wa bajeti ya mwaka 2015/16, Cheyo alisema amefurahishwa na bajeti kutokana na azima ya kupeleka umeme vijijini, kujitegemea na kuachana na utegemezi.
“Serikali inayotaka maendeleo ya koroboi na kibatari ni kurudi nyuma, kwanza mafuta ya taa yana ‘kabonmonoksaidi’ ambayo ni sumu, mimi ningekataza matumizi ya mafuta ya taa majumbani na badala yake wangekuwa wana ‘kanda’ (kubonyeza swichi za kuwasha umeme.”
Alisema Serikali ijayo, iwe serikali ya gesi na umeme wa jua ili kuachana na matumizi ya mkaa, na mafuta ya taa vijijini, hivyo ongezeko la kodi katika mafuta ya taa ni jambo sahihi na kusifia hatua ya serikali ya kuwekea uzio fedha za miradi.
“Tukijitegemea angalau tutaachana na upuuzi wa kuomba serikali za ughaibuni, na misaada yenyewe inakuja na masharti, ukikosea katikati wanakata hela. Aliongeza: “Mimi ni mjumbe wa Kamati ya Bajeti walipokuja wafadhili niliwaambia wazi kama kweli ni marafiki watuache tufanye yale tuliyokubaliana hata tukikosea katikati ya bajeti basi wapunguze bajeti ijayo. “Ni lazima tutafute njia ya kujitegemea, ni mwenendo unaofanya nchi kuwa huru. Kutegemea misaada kuna siku tutaletewa masharti ya ndoa za jinsia moja, nikiwa mzima tusifike huko.”
Alisema yeye ametumia fedha za jimbo kwa kuweka umeme wa jua katika shule za sekondari 21 katika wilaya ya Ikilima, jambo ambalo litasaidia kuongeza ufaulu wa wanafunzi.
Juzi jioni wakichangia mjadala wa bajeti, baadhi ya wabunge walisema asilimia 80 ya Watanzania wanaoishi vijijini wanategemea mafuta ya taa kwa ajili ya kuwasha taa nyakati za usiku, huku mafuta ya petroli na dizeli yatachangia kupaa kwa bidhaa na mfumuko wa bei.