Aidha, ameutaka uongozi wa Shirikisho la Soka Tanzania (TFF) kutekeleza wajibu wao ipasavyo kama ilivyokuwa kwa uongozi uliopita ili kupata mafanikio katika mchezo huo na kuondoa malalamiko yaliyopo sasa.
Akichangia Bajeti ya Serikali ya mwaka 2015/16, Azzan alisema hali ya sasa ya serikali kutopanga bajeti yoyote kwa ajili ya michezo, hakutaiwezesha Tanzania kupata ushindi katika nyanja ya michezo.
Alisema miaka ya nyuma, Tanzania ilikuwa ikifanya vizuri katika michezo mbalimbali ikiwamo soka na riadha, lakini sasa imekuwa haifanya vizuri kutokana na kutotengewa fedha za kutosha.
“Tanzania sasa inatia aibu katika michezo, mpira wa miguu ni aibu tupu na michezo mingine pia haifanyi vizuri. Tukiimarisha nyanja hii itakuwa na faida kama ilivyokuwa siku ya nyuma na kuwa chanzo cha mapato,” alisema Azzan aliyewahi kuwa Mwenyekiti wa Chama cha Soka Mkoa wa Dar es Salaam (DRFA) na cha Kinondoni (KIFA).
Aidha, Azzan ameutaka uongozi wa TFF kutakiwa kubadilika katika utendaji wa kazi kwa kuwa imekuwa ikilalamikiwa na wananchi na wamekuwa wakifanya mambo mengi yasiyofaa.
“TFF wanalalamikiwa sana na wananchi kuna haja ya kubadilika, wanatakiwa kuwajibika na kupata mafanikio kama uongozi uliopita,” alisema Azzan aliyewahi kuwa Mkurugenzi wa timu ya Tanzania Stars.
Kwa sasa TFF iko chini ya uongozi wa Rais wa shirikisho hilo, Jamal Malizi ambaye alishika kijiti hicho kutoka kwa uongozi wa Leodegar Tenga aliyeongoza kwa mihula miwili.
Kuhusu kocha wa Taifa Stars, Mart Nooij, Azzan alisema matatizo ya kocha ni kero na kuwa uwezo wake ni mdogo. Alisema tangu kuanza kufundisha Taifa Stars, ushindi kwa timu hiyo ni asilimia 10 na imefanya vibaya kwa asilimia kubwa.
Katika kampeni ya kutafuta kushiriki fainali za Kombe la Mataifa ya Afrika (AFCON), Taifa Stars ilifungwa mabao 3-0 na Misri mwishoni mwa wiki na Tanzania inaburuza mkia katika kundi G lenye pia Nigeria na Chad.
No comments:
Post a Comment