Waziri wa Habari, Utangazaji, Utalii na Michezo Said Ali Mbarouk alisema hayo wakati akijibu swali la Mwakilishi wa Jimbo la Wawi, Saleh Nassor Juma (CUF) aliyetaka kufahamu suala la uanachama wa Zanzibar katika Fifa na mikakati ya kuendeleza soka la ufukweni.
Akifafanua zaidi, Mbarouk alisema uwakilishi wa Zanzibar katika mashirika ya kimataifa unafanywa chini ya Jamhuri ya Muungano wa Tanzania kwa mujibu wa makubaliano ya muundo wake na mkataba wa Muungano wa mwaka 1964.
Alisema katika masuala ya soka ya kimataifa, Zanzibar inawakilishwa na Shirikisho la Soka Tanzania (TFF) kwa kutumia tiketi ya Jamhuri ya Muungano wa Tanzania kwa mujibu wa muundo wa Muungano uliopo sasa.
Alisema mashirikiano ya Zanzibar kupitia Chama cha Soka Zanzibar (ZFA) pamoja na TFF ni makubwa katika Fifa.
“Huo ndiyo ukweli wenyewe.... Zanzibar haiwezi kuwa mwanachama wa Shirikisho la Soka la Dunia (FIFA) kwa sababu sio nchi kamili inayojitegemea kwa mujibu wa makubaliano yetu tunashirikishwa katika masuala hayo na TFF,” alisema Waziri huyo anayesimamia sekta ya michezo.
Alisema wajumbe wa Baraza la Wawakilishi walikuwa na nafasi nzuri ambayo walipaswa kuitumia wakati walipokuwa katika Bunge Maalumu la Katiba kama wanataka mabadiliko makubwa katika suala la Muungano na muundo wake.
“Mchakato wa Bunge Maalumu la Katiba ilikuwa moja ya fursa nzuri ya Wazanzibari kutaka mabadiliko makubwa ya muundo wa Muungano ikiwemo suala la soka na Fifa, lakini wajumbe hawakuitumia fursa hiyo,” alisema.
Hata hivyo, Mbarouk alisema Zanzibar sasa imeanza kushiriki katika mchezo wa soka la ufukweni na kupata mafanikio makubwa kwa kushirikiana na TFF katika kutoa wachezaji mbalimbali wanaoshiriki katika michezo hiyo.
Alisema kwa Zanzibar zipo timu 12 zinazoshiriki katika ligi ya soka la ufukweni kwa upande wa Unguja na Pemba.
No comments:
Post a Comment