Mbunge adai kwa miaka 15 hajawahi kusinzia bungeni

Mbunge wa viti maalum mkoa wa Singida, Diana Chilolo (wa kwanza kushoto) akipokelewa na kikundi cha uhamasishaji cha Nyota cha Mandewa manispaa ya Singida. Chilolo alifanya ziara ya kikazi katika manispaa ya Singida hivi karibuni na kuwataka wanawake kuondoa woga na kujitokeza kwa wingi kuomba nafasi za uongozi katika uchaguzi mkuu ujao.

Mbunge wa viti maalum mkoa na Mwenyekiti wa UWT mkoa wa Singida,  Diana Chilolo,akizungumza na wajumbe wa Baraza la UWT Singida vijijini ambapo aliwataka wahamasishane katika kugombea nafasi mbali mbali za uongozi kwenye uchaguzi mkuu ujao.Kulia ni katibu wa UWT mkoa Anjela Robert na kushoto ni Katibu UWT wilaya ya Singida, Hadija Kissuda.

Baadhi ya wajumbe wa baraza la UWT manispaa ya Singida,wakimsikiliza mbunge wa viti maalimu na Mwenyekiti wa UWT mkoa, Diana Chilolo wakati akizungumza nao kwenye ukumbi wa mikutano wa chuo cha maendeleo ya wananchi mjini Singida. (DK)

Baadhi ya wajumbe wa UWT wilaya ya Singida vijijini,wakimsikiliza mbunge wa viti maalum na mwenyekiti wa UWT mkoa wa Singida,juzi kwenye ukumbi wa mikutano wa chuo cha wananchi mjini Singida.(Picha na Nathaniel Limu).

MBUNGE wa viti maalum (CCM) mkoa wa Singida, Mh. Diana Chilolo, amesema katika kipindi chake cha miaka 15 bungeni, hajawahi kusinzia wala kulala kwa madai kwamba muda wote amekuwa akisaka kwa udi na uvumba majibu kutoka serikalini ya kero zinazowasumbua wanawake na wananchi kwa ujumla.

Chilolo ambaye pia ni Mwenyekiti wa Jumuiya ya Wanawake (UWT) Tainzania mkoa wa Singida, alisema hayo wakati akizungumza kwenye kikao cha Baraza la UWT Manispaa ya Singida kilichofanyika kwenye Chuo cha Maendeleo ya Wananchi mjini hapa.

Akiijengea nguvu hoja yake hiyo,alisema hatua hiyo ya kutokulala au kusinzia bungeni, imepelekea awe mwanamke wa kwanza katika kuuliza maswali mengi ya msingi, hoja na mchango kuanzia mwaka wa 2005 hadi sasa.

“Bungeni ni mahali pa kuwasilisha kwa nguvu zote kero za wananchi na vilio mbalimbali, ili serikali iweze kuzitafutia ufumbuzi wa kudumu, ukisinzia tu wacha kulala au kuzurura ndani au nje ya bunge, utakuwa hauwatendei haki wananchi unaowawakilisha bungeni”, alifafanua.

Akisisitiza, Chilolo alisema bunge lina majukumu mengi makubwa ambayo ni pamoja na kuhakikisha kwamba nchi inaendeshwa vizuri, huduma zinatolewa kiusahihi kwa wananchi, na kwamba fedha za wananchi zinatumika vizuri na zinatolewa maelezo sahihi.

“Kwa hiyo kuanzia mwaka 2005-2009, utafiti wa uhakika unaonyesha kwamba nilikuwa mwanamke wa kwanza na mbunge wa nne kati ya wabunge 309 kwa kwa kujumuisha idadi ya awamu 214 (ushiriki) ambao mbunge aliuliza swali la msingi, swali la nyongeza au kutoa mchango.

Hapa nilitanguliwa na aliyekuwa mbunge, Dk.Slaa aliyekuwa na idadi 268, Mgana Msindai 256 na George Lubeleje 225″, alisema Chilolo.

Alisema toka kipindi hicho hadi sasa amekuwa akiongoza kwa ujumla wa ushiriki na kuuliza maswali ya msingi, nyongeza na kutoa michango mbalimbali kwa manufaa ya wakazi wa mkoa wa Singida na taifa kwa ujumla.

“Utendaji wangu huo bungeni,nina kila sababu ya kuwaambia au kuwaomba tena ridhaa mnichague kwa kunipa kura za kutosha kwenye uchaguzi mkuu ujao, ili niendeleze juhudi za kuwatumikia kwa vile nimeonyesha wazi kwamba uwezo wa kuwatumikia, ninao wa kutosha”, alisema na kushangiliwa kwa nguvu na wajumbe.

Kuhusu watu wanaotoa rushwa ili waweze kupata nafasi ya kugombea nafasi mbalimbali za uongozi, alisema mwanachama wa UWT anaweza kuchukua kile anacholazimishwa kupewa kwa madai hiyo ni riziki kwa vile hajaiomba wala kushawishi apewe kitu kwanza ndio aweze kutoa kura kwa mtoa rushwa.

“Kwa sababau kura ni siri ya mpiga kura, siku ya kupiga kura wewe fanya maamuzi yako sahihi chagua kiongozi bora mwenye uwezo na uzoefu wa kuwatumikia wananchi.

Rushwa sio tu itasababisha uchague bora kiongozi, lakini pia rushwa itauawa chama chetu na jumuiya zake”, alisisitiza Chilolo.