Mwandosya ataka wengi wajiandikishe kupigakura

WAZIRI wa Nchi, Ofisi ya Rais, Kazi Maalumu, Profesa Mark Mwandosya amesema wingi wa wadhamini wanaojitokeza kudhamini wanaCCM wanaowania kuteuliwa na chama chao kupeperusha bendera katika Uchaguzi Mkuu ujao, wahamasishwe pia kujiandikisha katika Daftari la Wapiga Kura.
Aidha, amewataka waliomwamini na kumdhamini, wengi wao wakiwa wasomi, kutotishika na utitiri wa wagombea, wakiwemo wale wanaodhaminiwa na maelfu ya watu, akisema hizo ni mbwembwe za kisiasa tu.
Mwandosya, mmoja wa wanaCCM zaidi ya 30 waliochukua fomu ya kuwania nafasi hiyo, alisema hayo jana mjini hapa alipokuwa akizungumza na wanaCCM wenzake waliojitokeza kumdhamini.
Katika siku ya jana wengi wa waliojitokeza kumdhanini Profesa Mwandosya walikuwa ni wasomi wa Chuo cha Ushirika, lakini pia walikuwapo mabalozi wa nyumba kumi pamoja na viongozi wa kata.
Profesa Mwandosya alionesha kufurahishwa baada ya kusikia kati ya wadhamini wake kwa siku ya jana walikuwa ni wasomi na kusisitiza wamemkumbusha alipokuwa akifundisha Chuo Kikuu.
“Msitishike na wanaodhaminiwa na watu 10,000 hizo ni mbwembwe za kisiasa zisiwape shida, wadhamini wanaotakiwa ni 30 tu, hii ni zamu ya udhamini tu ingawa zipo hisia, na hawa 10,000 wanatakiwa wahamasishwe pia kujiandikisha na wahamasishwe pia kufanya kazi ya kujenga Taifa,” alisema Profesa Mwandosya.
Aidha aliwashukuru wadhamini wake na kuwaahidi analo deni kubwa kwao na atarehesha imani hiyo kwa kulitumikia Taifa kwa moyo na nguvu zake zote.