Usafirishaji wa reli waikwaza TPA

KUSHUKA kwa kiwango cha uondoshaji mizigo bandarini kwa njia ya reli kutoka asilimia 10 mwaka 2008 hadi kufikia asilimia moja hivi sasa, kumeathiri uwezo wa Mamlaka ya Usimamizi wa Bandari Tanzania (TPA) kuweza kushindana kikamilifu na bandari za jirani.
Akitoa taarifa ya hali ya utendaji wa mamlaka hiyo kwa wahariri wa vyombo vya habari nchini jana, Kaimu Mkurugenzi Mkuu wa TPA, Awadhi Massawe alisema utendaji hafifu na kuzorota kwa huduma za reli nchini kumebakisha njia ya barabara kuwa tegemeo pekee kwa kusafirisha shehena kutoka bandarini kwa asilimia 99 na gharama za usafiri huo kuwa wa juu zaidi.
Alifafanua kwamba kudorora kwa uondoshaji wa mizigo kutoka Bandari ya Dar es Salaam pia kumeathiriwa na msongamano wa magari katika barabara za jiji, ubovu wa barabara zinazoingia na kutoka bandarini na zile zinazounganisha bandari hiyo na maeneo ya kuhifadhia makasha.
Akizungumzia mafanikio ya mamlaka yake, Massawe alitaja kuwa ni pamoja na kuongezeka kwa shehena iliyohudumiwa bandari ya Dar es Salaam kutoka tani milioni 12 mwaka 2012/2013 hadi kufikia tani milioni 14.6 mwaka 2013/2014, upakuaji wa magari kuongezeka kutoka magari 671 kwa shifti mwaka 2013 hadi kufikia magari 755 kwa shifti mwaka 2014, huku muda wa meli kukaa bandarini kwa ajili ya kupakia au kupakua mizigo kupungua kufikia siku 3.7 ikilinganishwa na lengo la siku 4 kwa mwaka 2014/2015.