Mzindakaya, DC mstaafu wamtambikia Pinda

MWANASIASA mkongwe nchini, Chrisant Mzindakaya na aliyekuwa mkuu wa wilaya ya Sumbawanga, Kanali mstaafu Anthony Mzuri ambao ni wazee maarufu mkoani Rukwa, wamemtambikia Waziri Mkuu, Mizengo Pinda.
Tambiko hilo ni katika harakati zake za kuwania kuteuliwa na CCM kuwa mgombea wa chama hicho katika uchaguzi mkuu ujao.
Pamoja na tambiko hilo lililofanyika mjini hapa juzi, Pinda alisema ana imani kubwa kuwa CCM kitatoa Rais ajaye mwenye sifa za uadilifu, mwaminifu na mtetezi wa wanyonge.
Pinda alisema hayo wakati akiwashukuru wanachama wa CCM waliojitokeza kumuunga mkono kwa kumdhamini katika kinyang’anyiro cha mbio za Urais waliokusanyika katika ukumbi wa CCM uliopo katika uwanja wa Saba Saba katika eneo la Izia mjini Sumbawanga mkoani Rukwa, juzi.
Mkoani Rukwa wana CCM 1,896 waliojitokeza kumdhamini ambapo katika wilaya ya Nkasi amedhaminiwa na wanachama 1,626 huku wilaya za Sumbawanga Mjini na Sumbawanga Vijijini wamejitokeza wanachama 270 waliomdhamini.
Akiwa mkoani Katavi Pinda alidhaminiwa na watu 9,141. Akifafanua, alisema ni faraja kwake kwani anaamini hakuna mgombea yeyote ambaye amejaliwa kunong’ona na Mwenyezi Mungu licha ya kuwa kila mmoja wao ana imani kuwa atakuwa yeye Rais ajaye.
Alitumia fursa hiyo kuwaaasa wagombea wenzake kuacha tabia ya kutukanana , kuchafuana, kulalamikia bali wapendane kwa sababu mwisho wa kinyang’anyiro hiki wote watakaoenguliwa hawana budi kuungana na kumuunga mkono atakayependekezwa na Mkutano Mkuu wa CCM kupeperusha bendera ya chama hicho katika Uchaguzi Mkuu wa Oktoba mwaka huu.