Wachina ‘waliozamia’ nchini wahukumiwa

RAIA watatu wa China wamehukumiwa kifungo cha mwaka mmoja jela au kulipa faini ya Sh 300, 000 baada ya kupatikana na hatia ya kuishi nchini na kufanya kazi bila kibali.
Washitakiwa hao waliohukumiwa katika Mahakama ya Hakimu Mkazi Kisutu ni Guo Chun Yang (44), Mi Yong (43) na Guo Jun Zang (43). Hakimu Mkazi Waliarwande Lema alitoa hukumu hiyo jana baada ya washitakiwa kukiri mashitaka yanayowakabili.
Awali Wakili kutoka Idara ya Uhamiaji, Method Kagoma alidai kuwa Juni 15, mwaka huu katika kituo cha mafuta cha GBP kilichopo Kawe, Kinondoni, washitakiwa wakiwa raia wa China walikutwa wakiishi nchini bila kibali.
Kagoma aliendelea kudai kuwa, washitakiwa walikutwa wakifanya kazi bila kibali, aidha wanadaiwa kutotii amri halali iliyotolewa na Mkurugenzi wa Idara ya Uhamiaji.
Katika hatua nyingine, Raia wa Kenya Ian Kamau (27), alifikishwa mahakamani hapo kwa tuhuma za kuishi na kufanya kazi nchini bila kibali. Baada ya kusomewa mashitaka, mshitakiwa alikiri kuishi nchini bila kibali na kukana kufanyakazi bila kibali.
Awali akisomewa mashitaka na Wakili kutoka Idara ya Uhamiaji Celestine Makoba, alidaiwa Juni 15, mwaka huu katika ofisi za Uhamiaji wilaya ya Ilala aliingia nchini bila kibali.
Aidha alidaiwa kujihusisha na biashara akiwa meneja wa kampuni ya IENET Technologies bila kibali. Mshitakiwa aliachiwa kwa dhamana na kesi imeahirishwa hali Julai 4 mpaka huu.