Makocha wakunwa na Stars Uganda

MSHAURI wa Ufundi wa timu ya soka ya taifa, Taifa Stars Abdallah Kibadeni amesema hakutarajia kuona kiwango kikubwa cha soka kutoka kwa wachezaji wa timu hiyo walipocheza na Uganda juzi.
Stars ililazimisha sare ya bao 1-1 na Uganda kwenye mechi ya kuwania kufuzu michuano ya Kombe la Mataifa Afrika kwa wachezaji wa ndani (CHAN) iliyochezwa kwenye uwanja wa Nakivubo mjini hapa.
Kibadeni ameteuliwa kuwa mshauri wa timu hiyo chini ya kocha Charles Mkwasa na Hemed Morocco. Wazawa hao walipewa mikoba ya kukinoa kikosi hicho baada ya Shirikisho la Soka Tanzania (TFF) kusitisha mkataba wake na Mholanzi Mart Nooij baada ya kupata matokeo mabaya mfululizo.
“Mimi kwanza sikutarajia kiwango kikubwa kama hiki, maana kwanza wachezaji wenyewe siwafahamu, lakini leo (juzi) nimeshuhudia mpira mkubwa sana hapa,” alisema. Kibadeni ambaye enzi za ujana wake aliwahi kuchezea klabu ya Simba na timu ya taifa alisema, timu iko vizuri la muhimu ni kupewa muda na kuungwa mkono na Watanzania.
“Kwa hiyo Watanzania jamani wasiache kutuunga mkono, hii ni timu yao, huu ni mwanzo tu, naamini tutafanya vizuri zaidi,” alisema. Baada ya Mkwasa kupewa mikoba ya timu hiyo amefanya mabadiliko makubwa kwenye timu, na mafanikio yake yameonekana katika mechi hiyo kwani timu ilibadilika na kucheza kwa morali ya hali ya juu.
Matokeo hayo ya sare yameiondoa Stars kwenye kinyang’anyiro hicho ambacho fainali zake zitafanyika mwakani mjini Kigali, Rwanda kwa jumla ya mabao 4-1 baada ya kufungwa mabao 3-0 katika mechi ya kwanza iliyochezwa mjini Zanzibar wiki mbili zilizopita.
Aidha; kocha mkuu wa timu hiyo Charles Mkwasa aliwaomba Watanzania kumpa muda zaidi ili aendelee kuinoa timu hiyo ambayo haijawahi kushinda kwa muda mrefu huku akiridhishwa na kiwango kilichooneshwa na timu yake.
Naye kocha wa timu ya taifa ya Uganda, The Cranes Sredjovic Milutin ‘Micho’ aliimwagia sifa Stars na kukiri kuwa, kikosi chake kupata ugumu dhidi ya wapinzani wake hao.
Mechi hiyo ya kuwania kufuzu fainali za Kombe la Mataifa Afrika kwa wachezaji wa ndani (CHAN), ilichezwa kwenye uwanja wa Nakivubo mjini hapa na matokeo kuwa sare ya bao 1-1.
Micho alisema baada ya mchezo huo kuwa hakutarajia kupata upinzani mkubwa katika mechi hiyo kama ilivyotokea. Katika mechi ya kwanza iliyochezwa kwenye uwanja wa Amaan Zanzibar wiki mbili zilizopita, Cranes ilishinda mabao 3-0 na kufanya kazi ya kusonga mbele kwenye michuano hiyo kuwa rahisi kwao.