Miswada mingine iliyokuwa ikipigiwa kelele, ambayo pamoja na huo wa petroli iliwasilishwa kwa pamoja bungeni juzi ni Muswada wa Sheria ya Usimamizi wa Mapato ya Mafuta na Gesi wa Mwaka 2015 na Muswada wa Sheria ya Uwazi na Uwajibikaji katika Tasnia ya Uchimbaji Tanzania wa Mwaka 2015.
Kutokana na hali hiyo wabunge zaidi ya 40 wa kambi ya upinzani kutoka vyama vinavyounda Umoja wa Katiba ya Wananchi (Ukawa), walitolewa nje ya Bunge Ijumaa na juzi kutokana na kufanya fujo wakati wa hatua za kutaka kusomwa kwa miswada hiyo.
Baadhi ya wabunge hao wamefungiwa kuhudhuria vikao vyote vilivyobaki vya Bunge hilo na baadhi wamesimamishwa kuhudhuria vikao viwili na wengine vitano mfululizo.
Spika wa Bunge, Anna Makinda alisema muswada huo ulipitishwa kwa kauli moja kwa wabunge kuitikia kwa kusema ndiyo, wakati waliosema hapana hawakuwepo, hivyo sasa unasubiri Rais Jakaya Kikwete ausaini ili uwe sheria.
Mbunge wa upinzani aliyekuwepo ni Hamad Rashid Mohammed (CUF-Wawi). Miswada hiyo iliingia kwikwi kuwasilishwa bungeni baada ya semina ya wabunge Jumanne iliyopita iliyoandaliwa na Wizara ya Nishati na Madini mjini hapa, ambapo wabunge wengi waliochangia siku hiyo waliomba serikali isifanye haraka kuiwasilisha kwani muda hautoshi kujadili masuala hayo nyeti.
Akichangia muswada wa mafuta kwa kujibu baadhi ya hoja za wabunge jana, Naibu Waziri wa Nishati na Madini, Charles Mwijage, alisema baadhi ya watu wanapinga muswada huo kwa sababu unatoa nafasi ya asilimia 25 kwa kampuni ya Taifa, pia umeunda mamlaka ya udhibiti na pia hawapendi ushiriki wa serikali katika masuala ya mafuta na gesi.
Akichangia hoja mapema jana kuhusiana na miswada hiyo, Mbunge wa Viti Maalum, Martha Mlata (CCM), alisema kuna haja ya Watanzania kuwa makini na kwamba gesi isijekuwa chanzo cha machafuko kama baadhi ya nchi.
Naye Mbunge wa Tabora Mjini, Ismail Rage alisema ni vyema kampuni za mafuta na gesi zikalazimishwa na sheria kujiunga katika masoko ya hisa hapa nchini ili kuwasaidia wananchi, badala ya kuachwa wawe katika masoko ya hisa ya nchi wanazotoka.
Kwa upande wake wakati akiwasilisha maoni ya Kamati ya Nishati na Madini juzi kuhusiana na muswada wa petroli, Mbunge wa Sumve, Richard Ndassa (CCM), alisema serikali isikubali kufanyia marekebisho kifungu cha 220 cha muswada huo.
Alisema kifungo hicho kilitolewa ushauri na Umoja wa Kampuni Kubwa za Mafuta na Gesi (OGAT) kwa kupunguza masharti kuhusu kampuni ya nje inayotaka kuwekeza kwenye utoaji wa huduma na bidhaa katika tasnia ya mafuta na gesi asilia kushirikiana na kampuni ya Tanzania kwa ubia wa asilimia 25.
“Moja ya hoja zao ni kwamba hakuna Mtanzania mwenye fedha za kutosha kuwekeza kwenye tasnia ya mafuta na gesi asilia nchini kwa vigezo vya uzoefu wa kimataifa wanavyotumia wao.
“Kamati haikubaliani na maoni hayo, kwani yanalenga kuwabagua Watanzania kwa kuwajengea fikra za kushindwa hata kabla ya kuanza,” alisema na kushauri serikali iimarishe mazingira ya kibiashara kuwajengea uwezo wananchi wake waweze kushiriki katika fursa za kiuchumi.
Pia alisema serikali ihakikishe inadhibiti kampuni bandia kutoka nje ambazo zitajaribu kuonekana ni za hapa nchini. Wakati akiwasilisha muswaada huo juzi, Waziri wa Nishati na Madini, George Simbachawene, alisema unalenga kuondoa changamoto mbalimbali zilizojitokeza kwenye sera, sheria na miongozo mbalimbali ambayo ilikuwepo kwa muda mrefu ili kuleta ufanisi bora zaidi katika sekta ya gesi asilia.
Alisema hatua hiyo ni kutoa fursa kwa Watanzania kushiriki katika shughuli mbalimbali za kiuchumi/ kiuwekezaji katika sekta za mafuta na gesi asilia nchini.
Alisema muswada huo unaanzisha taasisi tatu mpya ambazo ni Ofisi ya Ushauri Kuhusu Petroli na Gesi chini ya Ofisi ya Rais, Kampuni ya Mafuta ya Taifa na Mamlaka ya Udhibiti wa Shughuli za Mkondo wa Juu wa Mafuta (PURA).
Wakati huohuo, Mbunge wa Rombo, Joseph Selasini (Chadema) na Mbunge wa Gando, Khalifa Suleiman Khalifa (CUF) jana walitoka nje ya Bunge muda mfupi baada ya kuomba mwongozo kwa Spika, Makinda wakidai wamedhalilishwa na Kamati ya Haki, Maadili na Madaraka ya Bunge iliyodai walijutia kosa la kufanya fujo bungeni.
Wakizungumza kwa nyakati tofauti bungeni hapo, walidai hawakutoa kauli hizo walipoitwa na kamati hiyo na kwamba hoja zilizotolewa na kamati hiyo zilikuwa na lengo la kuwadhalilisha.
Hata hivyo Spika Makinda akijibu miongozo yao alisema ataenda kujiridhisha kwa kuangalia hansad, ambapo baada ya majibishano na wabunge hao waliinuka na kuamua kutoka nje ya Bunge.
Akizungumzia jambo hilo, Waziri wa Nchi Ofisi ya Rais, Sera, Uratibu na Bunge, Jenista Mhagama, alisema kama wabunge hao wanaona wameonewa wakate rufani kwani taratibu ndiyo zinavyotaka.
No comments:
Post a Comment