Acheni kukaa vijiweni, Lowassa aasa Watanzania

WATANZANIA wameshauriwa kufanya kazi kwa bidii ili kujiletea maendeleo badala ya kukaa vijiweni na kuwajadili watu, jambo ambalo haliwezi kuwapa tija yoyote.
Kauli hiyo ilitolewa jana na Waziri Mkuu mstaafu, Edward Lowassa wakati alipofika mjini Bukoba kwa lengo la kutafuta wadhamini, ikiwa ni hatua mojawapo ya kutekeleza utaratibu wa CCM kwa makada wake wanaowania uongozi katika nafasi mbalimbali.
Kwa upande wa Urais, nafasi anayoiomba Lowassa sambamba na makada wengine zaidi ya 30, sharti mojawapo ni mgombea kuwa na wadhamini 450 kutoka jumla ya mikoa 15 Tanzania Bara na Visiwani.
Alisema wakati umefika watu waanze kubadili mawazo ya kutoka katika hali ya kukaa vijiweni na kupita wakiwakejeli wenzao kwa maneno yasiyofaa bali watumie muda mwingi katika kufanya kazi ili waweze kujiletea maendeleo endelevu yatakayowafanya waishi bila kulalamika.
Lowasa katika mkoa wa Kagera amepata wadhamini 6,500.