Hadhari ya maisha kupanda yatajwa Bungeni

Bunge imesifu juhudi za serikali za kutaka kuongeza fedha kwenye Mfuko wa Umeme Vijijini (REA) kwa kupandisha bei ya petroli, dizeli na mafuta ya taa, lakini ikaitaka serikali kuchukua tahadhari dhidi ya athari zinazoweza kujitokeza kwa hatua hiyo.
“Kupeleka umeme vijijini kutaleta manufaa makubwa kwa wananchi kwani kutachochea maendeleo ya kiuchumi na kijamii… lakini kwa kuwa tozo zitakazokwenda kwenye mfuko zinatokana na mafuta na barabara, hatua hii inaweza kusababisha gharama za maisha kupanda,” alisema Makamu Mwenyekiti wa Kamati ya Bajeti, Kidawa Salehe, bungeni mjini Dodoma jana.
Makamu Mwenyekiti huyo alikuwa akiwasilisha bungeni Taarifa ya Kamati yake kuhusu Hali ya Uchumi wa Taifa kwa mwaka 2014, Mpango wa Maendeleo wa Taifa kwa mwaka 2015/16, Tathmini ya Utekelezaji wa Bajeti ya Serikali kwa mwaka 2014/15 pamoja na Bajeti ya Serikali 2015/16.
Katika bajeti ijayo, Serikali inapendekeza kuongeza tozo ya mafuta ya dizeli kutoka Sh 50 kwa lita hadi Sh 100 kwa lita; petroli kutoka Sh 50 hadi Sh 100 kwa lita na mafuta ya taa kutoka sh 50 kwa lita hadi Sh 150.
Waziri wa Fedha, Saada Mkuya Saluma alisema bungeni wiki iliyopita kwamba Sh milioni 139.7 zitakazopatikana kutokana na ongezeko hilo zitaelekezwa katika mfuko wa REA.
Kadhalika, alisema mafuta ya taa yameongezwa kodi ili kuondoa uwezekano wa kuchakachua. Nayo bajeti mbadala iliyosomwa bungeni jana na Waziri Kivuli wa Fedha, James Mbatia, iliitaka serikali kufikiria upya uamuzi wake wa kuongeza tozo kwenye mafuta.
Mbatia alisema nishati ya mafuta ni suala mtambuka linaloweza kuongeza mfumuko wa bei na kusababisha ugumu zaidi wa maisha kwa Watanzania.
Waziri wa Nishati na Madini, George Simbachawene, aliwakumbusha wabunge wanaolalamikia tozo hiyo kwenye mafuta kwamba ilitokana na wabunge wenyewe kupitia kamati mbalimbali.