Pinda aanza na wadhamini 4,200

MGOMBEA wa nafasi ya Urais wa Tanzania kwa tiketi ya CCM ambaye pia ni Waziri Mkuu wa Jamhuri ya Muungano wa Tanzania, Mizengo Pinda ameanza safari ya kusaka wadhamini kwa kuzuru Mkoa wa Katavi.
Pinda aliyewasili Mpanda juzi jioni, alipokewa na maelfu ya wakazi wa mji wa Mpanda ambao waliamua kumsindikiza kwa mchakachaka na bodaboda kutoka uwanja wa ndege hadi nyumbani kwake, Makanyagio.
Kufikia jana mchana alikuwa amekwishapata wadhamini 4,243 kwa kuzuru vituo viwili tu vya Inyonga na Mpanda Mjini.
Ratiba yake inaonesha atazuru vituo vitatu katika mkoa wa Katavi. Katika kituo chake cha kwanza, aliwasili Inyonga yalipo makao makuu ya wilaya yake ya Mlele ambako alipata wadhamini 1,440.
Alirejea Mpanda saa 9 mchana ambako katika ofisi ya CCM Wilaya alipata wadhamini 2,803.
Hata hivyo, bado anaendelea na safari ya kuelekea kijijini kwake Kibaoni, kata ya Mpimbwe, wilayani Mlele ambako ni upande wa bondeni wa wilaya ya Mlele ambako pia alikuwa anasubiriwa na wadhamini wake.