Msuya aangukia kwa Membe

BAADA ya aliyewahi kuwa waziri katika wizara mbalimbali awamu ya kwanza, George Kahama kutangaza hadharani kumuunga mkono Waziri wa Mambo ya Nje na Ushirikiano wa Kimataifa, Bernard Membe kuteuliwa na chama chake kugombea Urais, naye Waziri Mkuu wa zamani, David Msuya amejitokeza hadharani kumuunga mkono Waziri Membe.
Msuya akizungumza na waandishi wa habari nyumbani kwake kijijini Mwanga, Same jana, alisema amejiridhisha na uongozi wa Membe huku akieleza kuwa hakuna sababu ya CCM kushindwa kumteua kuwa mgombea wake.
“Mwanzoni mjadala huu wa wagombea ulipoanza watu walikuwa wakijadili majina ya watu, lakini mimi nikasema hapana, tujadili sifa na si majina na bahati nzuri chama kupitia kwa Philip Mangula, Makamu Mwenyekiti wa chama tayari ameziweka hadharani nadhani ni kumi na tatu.
“Huwezi kutangaza nia ama kutaka kuongoza kupitia CCM kama hujajipima na sifa hizo lakini mimi kwa sifa hizi kumi na tatu za chama sioni sababu hata moja ya chama kushindwa kukuteua maana ninaona unazo zote,” alisema Msuya na kuongeza; “Mimi nakuunga mkono kwa nguvu zote maana umefaulu kinachotakiwa sasa ni wewe kufuata taratibu za chama kisha usubiri maamuzi ya chama mwezi ujao lakini sisi hapa Mwanga tunakupa baraka zote na ufanikiwe safari hii ambayo kwa kweli mimi ninaamini hakuna Mtanzania atakayejuta wewe ukiwa Rais wa Jamhuri ya Muungano wa Tanzania.”
Msuya kama alivyo Sir Kahama anatajwa kuwa miongoni mwa wazee pekee waliosalia nchi hii wenye heshima kubwa kutokana na kustaafu nyadhifa zao wakiwa hawana kashfa za ukosefu wa maadili katika utumishi wa umma.
Akizungumzia suala la maadili Msuya alisema; “ kusema kweli suala la uadilifu linawakera sana Watanzania hasa hili eneo la rushwa kubwa na ufisadi ndio maana anapojitokeza mtu asiye na sifa hiyo ya rushwa na ufisadi ni rahisi sana kumkubali, tunakupa baraka zote ili uendeleze pale walipofikia wenzio ukianza na waasisi.”
Naye Membe akijibu maoni hayo ya Msuya alisema; “ ninashukuru sana mzee wetu, ninashukuru kwa kunitia moyo katika safari hii iliyoanza kama ndoto yangu na sasa ni ndoto yako pia na ninaamini ni ndoto ya Watanzania sasa kupata kiongozi anayeweza kuendeleza mazuri yaliyofikiwa na uongozi uliotangulia na sasa tunataka tuwe na uchumi wa viwanda unaobebwa na kilimo.”
Membe alipita kumjulia hali Mzee Msuya huku akiwa katika ziara ya kutafuta udhamini wa wanachama ili kutimiza moja ya masharti na kanuni za chama hicho.