Sospeter Muhongo, amesema wawania urais wanaowaambia wananchi kuwa watafufua viwanda vilivyokufa au kubinafsishwa kwa wawekezaji ambao wamebadili matumizi ya majengo hayo, hawasemi ukweli.
Aliyasema hayo jana katika ofisi ya CCM Mbeya Mjini, alipokuwa
akizungumza na wanachama wa Chama Cha Mapinduzi (CCM), waliojitokeza kumdhamini na kumsikiliza ili achaguliwe na chama hicho kuwania nafasi ya urais mwaka huu.
“Anayeahidi kuwa atafufua hivi viwanda vikiwepo vya hapa Mbeya na kule kwetu Mara ni mtu wa karne moja kurudi nyuma, maana viwanda hivi hata viwanda vilivyotengeneza spare zake huko nje navyo havipo. Mimi nitakachokifanya ni kujenga viwanda vipya vya kisasa” alisema huku akishangiliwa.
Alisisitiza kuwa, wananchi wa Tanzania wa sasa, hawahitaji propaganda bali wanahitaji kuoneshwa njia ya kutatua matatizo yao kwasababu wamechoshwa na umasikini.
Aliwaambia wanachama hao kuwa Tanzania ina mali nyingi sana na
inahitaji kiongozi mwenye mawazo mapya na mbinu mpya za kutatua umasikini ulio miongoni mwa jamii badala ya kuchagua viongozi wale wale ambao wanaahidi yale yale yanayoshindwa kuwakwamua wananchi.
“Mimi siombi nafasi ya urais kwasababu nafasi ipo wazi na kutaka
kwenda na marafiki Ikulu, bali ninahitaji nafasi hii kwasababu ya
kuondoa umasikini kwa watanzania na mtaji katika nchi hii upo katika madini na asilimia kama kumi pekee ya madini ndiyo yaliyochimbwa hapa nchini” alisema Prof. Muhongo.
Alisema anajivunia katika usimamizi wa umeme kwa kipindi chake ambapo Tanzania ina jumla ya Vijiji 15,186 na hadi kufikia mwaka 2012 ni vijiji 3, 734 sawa na asilimia 24.6 ndivyo vilikuwa na umeme. Miradi iliyosimamiwa kwa umahiri wake ikiwemo kutafuta fedha kutoka nje ya nchi na kufikisha Vijiji 5,234 Juni 2015 mwaka huu na umeme huo unaunganishwa kwa Shilingi 27, 000 sawa na majogoo matatu ya kuku.
Kwa takwimu hizo, Mtandao Huu wa New Day Taarifa umebaini kuwa katika suala la gharama za kuunganisha umeme kwa mkoa wa Mbeya hasa Vijjini si kiasi hicho kilichotajwa na Prof. Muhongo, bali kiasi kinachotozwa kwa ajili ya kuunganishiwa umeme ni Shilingi 177,000, fedha ya mkandarasi anayetambulika na shirika hilo ni Shilingi 45,000-80,000/= na nauli ya kukodi Tax kwa injinia wa Tanesco kwenda kuangalia nyumba ilipo kijijini ni Shilingi 10,000 – 20,000/=
Hata hivyo, Prof. Muhongo alipata wadhamini 45 ambapo baadhi ya waliokuwa wamejitokeza kwa ajili ya kumdhamini hawakupata nafasi ya kufanya hivyo akiwemo Mchungaji Anyelwisye Mwaisela kutoka Mbalizi wilaya ya Mbeya Vijijini ambapo aliwaomba wajitokeze kumdhamini katika uchaguzi mkuu unaotarajiwa kufanyika Octoba mwaka huu.
Wawania wengine nafasi ya urais kupitia chama hicho ambao wanatarajia kudhaminiwa na wanachama wa mkoa wa Mbeya ni Waziri Mkuu aliyejiuzulu, Edward Lowassa ambaye anatarajia kufika mkoani Mbeya Juni 19 mwaka huu na Prof. Mark Mwandosya anayetarajia kufika Juni 22, mwaka huu huku
duru za siasa zikisema kuwa Mwenyekiti wa CCM wilaya ya Rungwe Ally Mwakalindile, anakotoka Prof. Mwandosya, amejiunga rasmi kambi ya Lowassa na alitambulishwa rasmi katika kikao kilichoketi katika Hotel ya Beaco Jijini Mbeya Jumapili ya Juni 14, mwakahuu kikiongozwa na Mwenyekiti wa Mbeya Mjini ndugu Mwaitenda.
No comments:
Post a Comment