Wabunge wahimiza viwanda vya ndani kulindwa

SERIKALI imeshauriwa kujizatiti katika kulinda viwanda vya ndani kwa kuzuia uingizwaji wa saruji na sukari kutoka nje ya nchi.
Aidha, Serikali imetakiwa kujielekeza zaidi katika kukusanya kodi kwenye sekta ya mawasiliano hususani katika matumizi ya simu za mkononi.
Akichangia katika mjadala wa Bajeti Kuu ya serikali unaondelea bungeni mjini hapa, Mbunge wa Kinondoni, Idd Azzan (CCM) alisema sukari kutoka nje ya nchi imekuwa ikiingizwa kwa wingi kinyemela, jambo ambalo linadhoofisha viwanda vya ndani.
“Nipongeze hatua ya Serikali kuweka kodi katika uingizwaji wa sukari inayotoka nje katika bajeti ya mwaka huu, kwani itasaidia kudhibiti uingizaji holela wa sukari unaochangia kuua viwanda na kuongeza mapato ya serikali,” alisema.
Pia aliiomba Serikali kuangalia uwezekano wa kudhibiti uingizwaji wa saruji kutoka nje ambao hivi sasa umekithiri na kuathiri viwanda vya ndani ya nchi.
Naye Mbunge wa Gando, Khalifa Suleiman Khalifa (CUF), alisema bidhaa zinazoingia kinyemela kutoka nje ya nchi zipo nyingi ikiwemo saruji na sukari hali hiyo inaua viwanda vya ndani, wamiliki na wafanyakazi wa viwanda hivyo.
Kuhusu ukusanyaji wa kodi, Khalifa aliishauri Serikali kuwa na vyanzo vipya vya mapato kwa kujikita katika kukusanya mapato ya simu ambayo amesema serikali inaweza kupata fedha nyingi.
Mbunge wa Kwela, Ignas Malocha (CCM) alisema kutofikiwa kwa malengo ya makusanyo ya kodi kunatokana na tatizo la uaminifu kwa baadhi ya watendaji.
Alizungumzia kitendo cha serikali kutowalipa wakulima madeni yao kwa takribani miezi nane sasa. Mbunge wa Kuteuliwa, James Mbatia ametaka ushirikishwaji wa binafsi kwenye uchumi na kutaka uimarishwaji wa bandari ili uweze kusaidia kuongeza mapato.