32 wauawa siku ya 100 ya uvamizi wa Saudia Yemen

Wananchi 32 wa Yemen wameuawa na makumi ya wengine kujeruhiwa katika siku ya mia moja ya mashambulio ya kikatili ya Saudi Arabia dhidi ya nchi hiyo ya Kiarabu.
Ndege za kijeshi za Saudia mapema leo Jumamosi zimefanya mashambulio kadhaa kwenye maeneo tofauti ya Sana'a, mji mkuu wa Yemen.
Mtandao wa habari wa Sabanet umeripoti leo kuwa, raia 10 wa Yemen wameuawa na wengine wengi kujeruhiwa baada ya ndege za Saudia kushambulia makazi ya raia kwenye eneo la Baytul Faqih katika mkoa wa al Hudaydah, magharibi mwa Yemen.
Raia wengine wanne wa Yemen wameuawa na wengine 12 kujeruhiwa baada ya ndege za adui kushambulia eneo la Jaraf mkoani Sana'a.
Raia wengine watatu wa Yemen wa familia moja wameuawa na wengine kadhaa kujeruhiwa katika mashambulizi ya Saudia kwenye eneo la an Nahdha huko Sana'a.
Saudia Arabia inaendeleza mashambulizi yake ya kikatili dhidi ya wananchi wa Yemen bila ya kujali kuwa wananchi hao Waislamu wamo katika funga ya mwezi mtukufu wa Ramadhani.