Sarafraz: Saudi Arabia haijafikia malengo yake Yemen

Mkuu wa Shirika la Utangazaji la Jamhuri ya Kiislamu ya  Iran  amesema kuwa mashambulizi ya miezi mitatu iliyopita ya Saudi Arabia huko Yemen hayajakuwa na matunda yoyote kwa nchi hiyo. Dakta Muhammad Sarafraz Mkuu wa Shirika la Utangazaji la Jamhuri ya Kiislamu ya Iran ameashiria kushindwa na kugonga mwamba Saudi Arabia huko Yemen na kueleza kuwa: Licha ya mashambulizi hayo makubwa huko Yemen, lakini Riyadh haijaweza kutimiza malengo yake ya kijeshi na kisiasa nchini humo na hivi sasa harakati ya wananchi wa Ansarullah inadhibiti maeneo mengi ya Yemen. Dakta Sarafraz ameyasema hayo jana katika marasimu ya kuadhimisha mwaka wa nane tangu kuanzishwa kanali ya matangazo ya Press Tv. Katika sehemu nyingine ya hotuba yake, Dakta Muhammad Sarafraz ameelezea hali nyeti ya sasa katika eneo , mazungumzo ya nyuklia ya Iran na kundi la 5+1 na matukio ya kisiasa ya Uturuki na kuongeza kuwa: Kwa kuzingatia mabadiliko ya kisiasa yanayojiri nchini Uturuki, upo uwezekano kwa serikali ya nchi hiyo kuchukua hatua za kichokozi dhidi ya Syria kwa kustafidi na pengo la madaraka lilipopo nchini humo.  Mkuu wa Shirika la Utangazaji la Jamhuri ya Kiislamu ya Iran pia amesema kuwa, kuwepo anga nzuri ya maelewano na ushirikiano mzuri kati ya wafanyakazi na wakurugenzi wa kanali ya Press Tv kumekifanya chombo hicho kipate mafanikio. Katika marasimu hayo ya kuadhimisha mwaka wa nane tangu kuasisiwa kanali ya Press Tv, naye Muhammad Akhgari Mkurugenzi wa Kitengo cha Matangazo ya Ng'ambo  katika Shirika la Utangazaji la Iran ameashiria mipango iliyozaa matunda katika kanali ya Press Tv katika miezi ya hivi karibuni ikiwemo tovuti mpya ya kanali hiyo, na kueleza kuwa, kanali hiyo ni moja ya mafanikio makubwa ya shirika la utangazaji la taifa la Iran. Muhammad Akhgari amesema anataraji kuwa mafanikio hayo yatadumishwa zaidi na zaidi.