Daesh yauza kimagendo vitu inavyoiba Syria na Iraq

Wataalamu wa athari za kale na wataalamu wa vitendo vya uhalifu wamesema kuwa athari za kale zinavyoibiwa na kundi la kigaidi na kitakfiri la Daesh zinauzwa kimagendo nchini Unigereza. Wataalamu hao wamesema kuwa, tofauti na linavyodai kundi la kitakfiri la Daesh kwamba linavunja athari za kale huko Syria na Iraq kwa sababu ni nembo za shirki, uhakika wa mambo ni kuwa, genge hilo la kigaidi linapora athari za kale za nchi hizo mbili na kuziuza kimagendo katika nchi za Ulaya kama njia ya kujipatia fedha. Gazeti la The Guardian la nchini Uingereza limeripoti kuwa, athari hizo za kale ni pamoja na vyombo vya udongo, vioo vya kale, visanamu vidogo na kazi nyingine za kale zenye thamani ya mamia ya maelfu ya dola. Hii ni katika hali ambayo Shirika la Elimu, Sayansi na Utamaduni la Umoja wa Mataifa UNESCO wiki iliyopita lilielezea wasiwasi wake kuhusu suala hilo na kusema kuwa kundi la kigaidi la Daesh linaiba kiwango kikubwa cha athari za kihistoria za Iraq na Syria. Mkurugenzi mkuu wa shirika hilo alisema mjini London Uingereza kuwa kundi la kigaidi la Daesh linauza athari za kale za kihistoria za Iraq na Syria kwa madalali na kujiingizia fedha nyingi