Human Rights Watch yalaani jinai za Saudia Yemen

Shirika la Haki za Binadamu la Human Rights Watch limelaani jinai zinazoendelea kufanywa na Saudi Arabia za kuua raia wasio na hatia huko Yemen na kutaka uchunguzi ufanyike na kufidiwa hasara zote zilizosababishwa na Saudia katika mashambulizi yake ya kikatili kwenye nchi hiyo ya Kiarabu. Mtandao wa habari wa Sabanet umenukuu ripoti ya shirika hilo yenye kichwa cha maneno "Mashambulizi Yaliyo Kinyume cha Sheria ya Saudia Nchini Yemen" na kuongeza kuwa, ndege za Saudi Arabia tangu mwanzoni mwa mwezi Aprili 2015 zimekuwa zikivunja sheria zote za kivita kwa kushambulia maeneo ya raia huko Saada Yemen na kuharibu nyuma za makazi ya watu pamoja na masoko na shule kadhaa vikiwemo pia vituo vya mafuta. Ripoti hiyo imeongeza kuwa, makumi ya raia wa Yemen wameuawa kwenye mashambulio hayo wengi wao wakiwa ni watoto wadogo. Bi Sarah Leah Whitson, Mkurugenzi Mtendaji wa Shirika la Haki za Binadamu la Human Rights Watch katika eneo la Mashariki ya Kati na Kaskazini mwa Afrika amesema kuwa, mashambulio ya ndege hizo za Saudia yanavunja sheria za kivita na inabidi uchunguzi kamili ufanyike kuhusu jinai hizo. Saudi Arabia ilianza kuishambulia kijeshi Yemen tangu tarehe 26 Machi, na hadi sasa maelfu ya watu wameshauawa na kujeruhiwa kwenye jinai hizo.