Ripoti ya Amnesty International kuhusu jinai dhidi ya binadamu katika Jamhuri ya Congo

Shirika la kutetea haki za binadamu la Amnesty International limesema hatua zilizochukuliwa mwaka jana na Jamhuri ya Congo Brazaville katika fremu ya kuwafukuza wahamiaji haramu nchini humo ni kielelezo cha jinai dhidi ya binadamu. Mwaka 2014 Jamhuri ya Congo Brazaville iliwafukuza maelfu ya raia wa Jamhuri ya Kidemokrasia ya Congo mjini Brazaville.
Ripoti ya Amnesty international imesajili kesi nyingi za ukatili, vitendo vya utumiaji mabavu na kutiwa nguvuni bila sababu kulikofanywa na vyombo vya dola vya Jamhuri ya Congo wakati wa kuwafukuza wahamiaji haramu nchini humo bila ya sababu yoyote. Ripoti hiyo inasema, jinai dhidi ya binadamu zilifanyika huko Congo Brazaville kwa kisingizio cha kuwasaka na kuwakamata wahajiri haramu. Katika operesheni hiyo iliyofanyika katika kipindi cha kati ya Aprili na Septemba 2014, karibu watu laki mbili na nusu ama walifukuzwa kutoka Congo Brazaville au walilazimika kuondoka nchini humo. Watu hao waliofukuzwa ni pamoja na wakimbizi waliokwenda Brazaville wakitafuta kazi na maisha baada ya kukimbia mapigano na ghasia za mashariki mwa Congo DR. Operesheni hiyo ya kuwafukuza raia wa DRC kutoka Jamhuri ya Congo ilivuruga uhusiano wa nchi hizo mbili zinazotenganishwa na Mto Congo.
Wataalamu wa Amnesty International wanaamini kuwa, operesheni ya kuwafukuza raia wa Jamhuri ya Kidemokrasia ya Congo kutoka Brazaville ilifanyika kwa shabaha ya kuchochea hisia za kuwachukia na kuwapiga vita wageni (Xenophobia) nchini humo. Vilevile maafisa usalama na polisi ya Congo Brazaville waliwanyanyasa kijinsia na kuwabaka wanawake na wasichana katika operesheni hiyo.
Uchunguzi uliofanywa na Amnesty International unaonesha kuwa, polisi ya Brazaville ilitumia vyombo vya mawasiliano ya umma kwa ajili ya kuchochea hisia za kuwapiga vita na kuwachukia wageni. Uchunguzi huo unaonesha kuwa, wakati huo zilitungwa nyimbo ambazo zilihamasisha ubaguzi kwa msingi wa utaifa, jinsia au dini. Nyimbo hizo zilisisitiza kuwa wageni- wakikusudiwa raia wa Jamhuri ya Kidemokrasia ya Congo- wanapaswa kurejeshwa nchini kwao.
Kwa sasa Amnesty International imeitaka serikali ya Congo Brazaville kusitisha mipango na ratiba zote za serikali ya Brazaville za kuwafukuza nchini humo raia wa kigeni. Vilevile imeitaka serikali ya Brazaville kuwachukulia hatua za kisheria wale wote waliohusika na jinai za ukiukaji wa haki za kimataifa za binadamu.