Malengo yaliyo nyuma ya pazia ya safari ya rais wa Ufaransa barani Afrika

                                                                                                                                                                                                                               Usiku wa Ijumaa sawa na tarehe tatu Julai, Rais François Gérard Hollande wa Ufaransa alimaliza duru ya safari yake barani Afrika kwa kuondoka mjini Yaoundé, mji mkuu wa Cameroon na kurejea nchini kwake Ufaransa. Safari yake ya kiduru barani humo, ilianzia nchini Benin, Angola na kisha Cameroon. Mazungumzo ya Hollande na viongozi wa nchi hizo tatu za Kiafrika, yalijikita juu ya mahusiano yao katika kupambana na ugaidi, kuimarisha usalama na kupanua wigo wa kiuchumi na kisiasa. Baada ya kumalizika kipindi cha ukoloni barani Afrika watawala wa Ufaransa, na kwa kutumia jumuiya ya nchi zinazozungumza Kifaransa ' Francophone', waliweza kuendeleza minasaba ya kitamaduni, kiuchumi na kisiasa kama ilivyokuwa enzi za ukoloni wa zamani barani humo. Pamoja na hayo tajriba chungu waliyoipata raia wa nchi hizo za Kiafrika zinazozungumza lugha ya Kifaransa kama vile Benin na Cameroon kutoka kwa wakoloni hao wa Ulaya dhidi yao, imepelekea kuibua hali ya mpasuko mkubwa baina ya serikali ya nchi hizo na Paris. Safari ya Rais François Hollande nchini Cameroon, inahesabiwa kuwa safari ya kwanza rasmi kuwahi kufanywa na rais wa Ufaransa ndani ya kipindi cha miaka miaka 14 ya hivi karibuni nchini humo. Weledi wa masuala ya kisiasa wa Afrika  wameitaja safari ya rais huyo wa Ufaransa nchini Cameroon siku ya Ijumaa kuwa yenye maana ya kufuliwa muhula mpya wa mahusiano ya pande mbili za Yaoundé na Paris. Mwaka 2001 rais wa wakati huo wa Ufaransa, Jacques René Chirac alifanya safari nchini Cameroon kwa lengo la kushiriki kikao cha pamoja baina ya Ufaransa na viongozi wa Afrika na kusisitiza kuwa, nchi mbili hizo zingeshuhudia uhusiano bora wa kuheshimiana na kuaminiana katika miaka ya baadaye. Hivi sasa na baada ya kupita miaka 14, Rais François Hollande amekutana na rais mwenza wa Cameroon Paul Biya na kusisitizia udharura wa kupambana na kundi la kigaidi la Boko Haram la nchini Nigeria. Mashambulizi ya kikatili ya kundi hilo la kigaidi na kitakfiri katika maeneo ya kaskazini mashariki mwa Nigeria na kupenya kwa wanachama wake hadi katika nchi jirani kama vile, Niger, Cameroon, Chad na Benin, kumetoa mwanya kwa serikali ya Paris kwa mara nyingine na kupitia kauli mbiu yake ya kupambana na ugaidi, kuweza kufungua upya uhusiano wake na mataifa hayo ya Kiafrika. Hii ni katika hali ambayo hapo nyumba, viongozi wa nchi hizo jirani na Nigeria, zilikwishaunda kikosi cha pamoja na kuanzisha operesheni kali zenye lengo la kulitokomeza kabisa kundi hilo la kigaidi la Boko Haram, operesheni ambazo zimetajwa kuwa zenye mafanikio. Hakuna shaka kwamba, safari ya Rais Francois Hollande nchini Benin na kisha Cameroon, ni kuitafutia nchi yake ubia katika vita hivyo dhidi ya kundi hilo la Boko Haram, ambalo kwa sasa limegeuka na kuwa tatizo kubwa kwa nchi jirani na Nigeria. Ni kwa ajili hiyo ndio maana rais huyo wa Ufaransa akatangaza utayarifu wa Paris kuwa mwenyeji wa kikao cha viongozi wa nchi za Kiafrika kwa ajili ya kuchukua hatua kali za pamoja dhidi ya kundi hilo. Ama malengo ya safari ya Francois Hollande nchini Angola ambayo inazungumza lugha ya Kireno huko kusini mwa bara la Afrika, inatofautiana sana na safari yake katika nchi za magharibi mwa Afrika. Angola ni nchi yenye utajiri mwingi wa mafuta ambayo baada ya Nigeria, inahesabiwa kuwa nchi ya pili mzalishaji wa nishati hiyo muhimu barani Afrika. Uhusiano wa nchi mbili hizo uliingia doa baada ya serikali zilizopita za Paris kuziunga mkono harakani za kupigania kujitenga eneo la Cabinda, kaskazini mwa nchi hiyo. Hata hivyo mahusiano hayo yaliboreka kufuatia safari ya rais wa zamani wa Ufaransa, Nicolas Sarkozy nchini Angola hapo mwaka 2008. Aidha Ufaransa inahesabika kuwa mshirika wa tatu wa Angola kibiashara na hadi sasa imekwishatia saini mikataba kadhaa ya kibiashara na kiuchumi na serikali ya Luanda. Hivyo uwekezaji katika sekta ya uwekezaji wa mafuta ndio lengo kuu la safari ya Rais François Gérard Holland nchini Angola.