Wezi Mfuko wa Mafuta, Gesi kuozea jela

BUNGE limepitisha miswada miwili iliyokuwa imesalia ya mafuta na gesi ambapo watakaobainika kuchota fedha katika Mfuko wa Mafuta na Gesi utakaoanzishwa watapewa adhabu mbalimbali ikiwemo kifungo cha miaka 30 jela au kufilisiwa mali zao.
Hata hivyo, wabunge wa upinzani wamemtaka Rais Jakaya Kikwete wakimuomba asisaini miswada hiyo, huku pia wakitangaza kususia vikao vyote vilivyobaki vya Mkutano wa 20 wa Bunge, ambalo linatarajiwa kumaliza uhai wake Alhamisi wiki hii kwa Rais Kikwete kuhutubia.
Akizungumza bungeni jana wakati akifanya majumuisho kwa kujibu hoja za wabunge mbalimbali waliochangia Muswada wa Sheria ya Usimamizi wa Mapato ya Mafuta na Gesi wa Mwaka 2015, Naibu Waziri wa Fedha, Adam Malima alisema muswada umeweka adhabu kali kwa watakaobainika kutumia fedha za mfuko huo.
Alizitaja adhabu hizo kuwa ni faini isiyopungua kiasi ambacho mhusika amechukua, au kifungo cha miaka 30 jela au vyote viwili kwa pamoja na kuongeza kuwa pia sheria inampa hakimu uwezo wa kutoa adhabu ya kumfilisi mhusika na kesi hiyo itakuwa ya uhujumu uchumi.
Muswada wa Sheria ya Usimamizi wa Mapato ya Mafuta na Gesi wa Mwaka 2015, unaweka masharti kuhusu uanzishwaji wa Mfuko wa Mafuta na Gesi ambao utakuwa na Akaunti mbili zitakazotunzwa na kusimamiwa na Benki Kuu ya Tanzania.
Akaunti hizo ni Akaunti ya Kupokea Mapato na Akaunti ya Kutunza Mapato. Muswada mwingine uliopitishwa jana ni Muswada wa Sheria ya Uwazi na Uwajibikaji katika Tasnia ya Uchimbaji Tanzania wa Mwaka 2015, ambapo wakati akijibu hoja mbalimbali za wabunge waliochangia, Waziri wa Nishati na Madini, George Simbachawene, alisema unalenga kuondoa changamoto mbalimbali zilizojitokeza kwenye sera, sheria na miongozo mbalimbali ambayo ilikuwepo kwa muda mrefu ili kuleta ufanisi bora zaidi katika sekta ya gesi asilia.
Pamoja na mambo mengine, muswada huo unaanzisha taasisi tatu mpya ambazo ni Ofisi ya Ushauri Kuhusu Petroli na Gesi chini ya Ofisi ya Rais, Kampuni ya Mafuta ya Taifa na Mamlaka ya Udhibiti wa Shughuli za Mkondo wa Juu wa Mafuta (PURA). Pia unaweka uwazi katika leseni na mikataba ya madini, gesi na mafuta.
Muswada huo ulipitishwa na wabunge wengi wa CCM, huku wa upinzani wakiwa wanne tu, ambao ni Philipa Mturano na Leticia Nyerere (Viti Maalumu Chadema) na wawili wa CUF, Said Suleiman Said (Mtambwe) na Hamad Rashid Mohammed (Wawi).
Akizungumza baada ya Bunge kupitisha miswada hiyo kwa nyakati tofauti jana, Spika wa Bunge, aliwapongeza wabunge kwa michango yao katika kuiboresha na kwamba sasa wanasubiri Rais Kikwete aisaini iwe sheria.
Muswada wa Sheria ya Petroli wa Mwaka 2015 wenyewe ulipitishwa juzi. Wakati huohuo, akizungumza na waandishi wa habari hotelini mjini hapa jana, Kiongozi wa Kambi Rasmi ya Upinzania Bungeni, Freeman Mbowe, alisema wanaomba Rais Kikwete asisaini miswada hiyo, ambayo iliwasilishwa kwa pamoja bungeni Jumamosi.
Pia alisema wabunge wote wa upinzani hawatahudhuria vikao vyote vilivyobaki vya Bunge ikiwa ni pamoja na kile cha Alhamisi, ambapo Rais Kikwete atahutubia Bunge ikiwa ni hatua mojawapo ya kuhitimisha uhai wa miaka mitano wa bunge hilo.
Alisema wabunge wote hao ambao wanatoka vyama vya Chadema, CUF, NCCR-Mageuzi NLD vilivyounda Umoja wa Katiba ya Wananchi (Ukawa) walitarajiwa kuondoka Dodoma jana kurejea Dar es Salaam kwa ajili ya vikao zaidi kwenye vyama vyao na baada ya kesho watazungumza hatua itakayofuata.